QR Aqparat jáne komýnıkasıalar mınıstri Dáýren Abaev Memleket basshysy Nursultan Nazarbaevtyń Úkimet pen Parlamentke jumystaryn qazaq tilinde ótkizýge qatysty tapsyrmasyn túsindirip berdi. Bul týraly Qamshy.kz aqparat agenttigi Qazaqparattyń málimetine súıenip habarlaıdy.

Mınıstrdiń aıtýynsha, Úkimette orys tilinde sóıleýge eshkim tyıym salmaǵan.

–Meniń túsinýimshe, Memleket basshysy Úkimet pen Parlamentte biz memlekettik tilge kóshetinimizdi aıtqysy keldi. Meniń oıymsha, bul memlekettik tildi meńgerý salasyna qatysty suraq. Biz Úkimet pen Parlamentte qazaq tilinde sóıleıtindeı jaǵdaıǵa kóshýimiz kerek. Biraq, «tek qana» degen sóz meniń bilýimshe aıtylmaǵan. Demek, bul Qazaqstannyń árbir azamatynyń memlekettik tildi meńgerý deńgeıine baılanysty, – deıdi mınıstr.

Dáýren Abaev óz sózinde eger Úkimet múshesi óz oıyn orys tilinde jetkizýge qulyqty bolsa, oryssha sóıleýine bolatynyn atap ótti.

Sonymen qosa, mınıstr otyrystarǵa qatysatyn tilshilerge sınhrondy aýdarma ázirlengendigin, al onlaın-kórilimdegi kórermender úshin mundaı aýdarma qarastyrylmaǵanyn tilge tıek etti. Osyǵan baılanysty BAQ ókilderi «orys tiline aýdarma jumysy qarastyryla ma?» degen saýal qoıdy.

–Meniń oıymsha, bul asa kúrdeli másele emes. Ony qarastyrýǵa bolady. Sizder reportaj jasap, mınıstrler aıtqan oıdy halyqqa jetkize alady dep oılaımyn, – dedi Dáýren Abaev.