Almaty oblysynda kóktemgi merzimdi áskerge shaqyrý naýqanyna qyzý daıyndyq júrip jatyr, dep jazady Qamshy.kz aqparat agenttigi.
Osyǵan oraı, Almaty oblysy ákiminiń birinshi orynbasary Lázat Turlashovtyń qatysýymen Qorǵanys isteri jónindegi departamentinde shaqyrý jáne medısına komısıasynyń tóraǵalary, jergilikti áskerı basqarý organdarynyń bastyqtary, UQKD, İİD, sondaı-aq Taldyqorǵan garnızony áskerı bólimderi ókilderiniń qatysýymen nusqaýlyq-ádistemelik jıyn ótkizildi. Jıynnyń basty taqyryby – 2017 jylǵy merzimdi áskerge shaqyrýdy qorytyndylaý, 2018 jylǵy kóktemgi shaqyrýdyń mindetteri men talaptaryn talqylaý.
Ár qurylymdyq bólimderdiń ókilderi óz salasyna qatysty taqyrypta baıandama jasap, merzimdi áskerge shaqyrýda oryn alatyn keleli máseleler men olardy sheshý joldarymen bólisedi.
Sonymen qatar, Qorǵanys isteri jónindegi biriktirilgen basqarmasy men bólim bastyqtary merzimdi ásker qataryna shaqyrýǵa daıarlyqtary, júrgizilgen jumystary men josparlary boıynsha tyńdalady.
Óz kezeginde Qorǵanys isteri jónindegi deparatmentiniń bastyǵy polkovnık Berdibek Beristemov shaqyrý mindeti júktelgen mamandardyń jaýapkershiligin erekshe atap ótti.
- Áskerge shaqyrý jumystaryn sapaly júrgizýdi basty nazarda ustaý qajet. Ásker qataryna qabyldanatyn azamattardyń densaýlyǵy myǵym, fızıkalyq daıyndyǵy kúshti, ári erik-jigeri myqty bolýy qatań qadaǵalansyn, - dep oıyn túıindedi ol.
Aıta keterligi, bıyl tuńǵysh ret jyljymaly shaqyrý komısıasy Almaty oblysyna qarasty qalalar men aýdandarda jumys júrgizdi. Komısıa quramyna jergilikti áskerı basqarý organdarynyń, ákimshiliktiń, densaýlyq saqtaý salasynyń, qurylymdyq kúshterdiń ókilderi kiredi. Kóktemgi áskerge shaqyrý naýqanyn sapaly, ári ýaqtyly oryndaý maqsatynda atalǵan komısıa ár shaqyrylýshyny jeke dara qarastyryp, alǵan bilimin, otbasy jaǵdaıyn eskere otyryp, densaýlyǵynyń jaramdylyǵyn basty nazarda ustap, ony ásker qataryna qabyldaý-qabyldamaý týraly sheshim qabyldaıdy.
Kóktemgi merzimdi áskerı qyzmetke qabyldaý naýqany 2018 jylǵy maýsym aıynyń sońyna deıin júrgiziledi.
