Oblys ákimi Danıal Ahmetov Óskemen qalasynyń sý basqan aýdandarynda bolyp, tabıǵı apattan zardap shekken turǵyndarmen kezdesti. Atap aıtqanda, aımaq basshysy shahardyń irgesindegi Krasın kenti men Ablaketka yqshamaýdandarynda qarǵyn sý basqan jeke úılerdiń turǵyndarymen jolyǵyp, hal-jaǵdaıyn bilip qaıtty. Bul týralý jergilikti Altaynews habarlady.
Qajetti jumystar júrgizilip jatqanyna qaramastan, búgin tańerteń oqıǵa ornyna barǵan oblys ákimi Danıal Ahmetov tótenshe jaǵdaılar departamenti men qala ákimdiginiń jumysyn qatań synǵa aldy.
— Sizder bir aryqtyń sýmen bir táýlik boıy alystyńyzdar. Aınaldyrǵan tórt úıdiń problemasyn osynshama uzaq ýaqyt sheshe almaýlaryńyz aqylǵa sımaıdy. Bul — baryp turǵan masqara ǵoı. Byltyr sizderge qomaqty qarajat bólip, mundaı jaǵdaıda qajetti bolatyn tehnıka alýǵa kómekteskenbiz. Sol tehnıka qaıda, nege paıdalanbaısyzdar? Jalpy, mundaı ahýaldyń qalyptasýyna tabıǵat emes, óz mindetterine salǵyrt qaraǵan keı laýazymdy tulǵalar kináli, — dedi ákim.
Esterińizge salaıyq, oblys ortalyǵynda eki kún boıy tolassyz jaýǵan qar aralas jańbyrdyń saldarynan qalanyń birqatar aýdany men kóshelerin sý basyp, tótenshe jaǵdaı qalyptasqan bolatyn. Apattan Krasın kentindegi Kojedýb jáne Pýshkın kósheleri boıynda ornalasqan tórt úıdiń turǵyndary zardap shekti. Jergilikti turǵyndardyń biri Andreı Tatarchenkonyń málimdeýinshe, mundaı jaǵdaıdyń oryn alýyna osy mańdaǵy aryq arnasynyń jóndi ári ýaqtyly tazalanbaýy sebepshi bolǵan. Nátıjesinde aryq sýy arnasynan asyp, irgedegi aýlalar 40 santımetrlik sý astynda qalǵan. Apatty joıý maqsatynda oqıǵa ornyna tótenshe jaǵdaı departamentiniń mamandary men tehnıkasy jumyldyrylyp, jeksenbi kúni túnniń bir ýaqytyna deıin júrgizilgen jumystardyń arqasynda aýlalar sýdan tazartyldy.
Dál osyndaı jaǵdaı Ablaketka yqshamaýdanynda da qalyptasqan. Biraq bul jerdegi eki aýlany basqan tereńdigi 80 santımetrlik sýdy joıý is-sharalary áli de jalǵasýda.
