Taqqa mingenine bir jyldan jańa asqan Shavkat Mırzıóev ózbek jurtyn ǵana emes, Ortalyq Azıa elderin de jıi-jıi aýzyna qaratyp kele jatyr. Aýzyna qaratqanda, dámdi sóz aıtyp, kósemsip júrgen joq. Islam Karımovtyń kezindegi qatqan seńdi buzyp, buqarany basqarýdyń ózindik arnasyn saldy. Ári sol arnaǵa quıatyn úkimet tirliginiń bárin halyqtyń qalaýy tóńireginen taýyp keledi.

Kesheli beri TMD aýmaǵyndaǵy birqatar basylymdar Ózbekstan prezıdentiniń pármenimen qaıta túlegen Manas aýyly týraly jańalyqty jarysa jarıalap jatyr. Jańalyqtyń tóresi sol, ıt baılasa, turǵysyz qıyrdaǵy qańyraǵan aýyl 45 kúnniń ishinde jarqyrap shyǵa kelgen. Onda da, aǵashyn áktep, jolynyń oı-shuqyryn bútindeıtin kózboıaýshylyq emes, irgesi 60-shy jyldary qalanyp, keıin qaraýsyz qalǵan eldi-mekendi súrip tastap, jańazamanǵa laıyq, múlde ózgeshe qalashyq turǵyzǵan. Qosqabatty kóppáterli úıler, emhana, balabaqsha, sport kesheni sekildi áleýmettik nysandardy bylaı qoıǵanda, teri men jún óńdeıtin shaǵyn óndiris oryndary da tusaýyn kesken. Tipti túıe sútinen dárilik preparat jasaıtyn seh ta ashylypty.

Aqparatqa qaraǵanda, Ózbekstan basshysy bul aýylǵa aqpan aıynda kelip, tıisti tapsyrmalar bergenge uqsaıdy. Mine, sodan 1,5 aı ǵana ýaqyt ótkende prezıdentttiń tapsyrmasy tap-tuınaqtaı etip oryndalǵan. Jańaryp, qaıta túlegen aýylǵa ekinshi márte kelgen Shavkat Mırzıóev qýanyshy qoınyna syımaǵan kópshilikke «qutty bolsyn» aıta otyryp, nókerlerine búı depti: «Halqymyzdyń qandaı jaǵdaıda turmys keship jatqanyn kórseń, janyń aýyrady. Bizdiń aldymyzda nendeı maqsattar men mindetter turǵanyn men osy Manas aýylyn mysalǵa keltire otyryp túsindireıin. Árıne, ońaı emes, sharýa shashetekten. Biraq órleýdi aýyldy túletýden, onda da, talqany shyqqan, jaǵdaıy múshkil aýyldardan bastamasaq, halyq bizge senbeıdi. Eshqashan senbeıdi!».

Bylaı qarasańyz, Ózbekstan basshysynyń áreketi bir oqpen eki qoıan atqanmen teń. Sebebi 6,5 myń halyq turatyn Manas aýylynda negizinen etnıkalyq qyrǵyzdar turady. Karımovtyń kezinde ózbek-qyrǵyz qatynasy tym shıelenisip ketkeni este. Endi mynadaı jaǵdaıdan keıin áriptesine Sooronbaı Jeenbekovtiń de ishi jylyp turary belgili. Qyrǵyz ben ózbek jurtynyń da bir-birine degen yqylas-peıili bekı túsedi. Munyń barlyǵy Tashkenttiń kórshilermen ári týystas eldermen qarym-qatynasty qalpyna keltirý saıasatymen úndes.

Al bastysy, ózbek basshysynyń aýyldy kóterýge qatysty bastamasy. Ózi aıtpaqshy, bul sharýanyń ońaı bolmaıtyny da ras. Degenmen nıet bar. Sol nıetti júzege asyratyn kúsh Mırzıóevtyń qolynda. Mırzıóev shendi-shekpendilerdiń eki aıaǵyn bir etikke tyǵyp, halyqqa basyn ıdirgen saıyn buqaranyń da bılikke degen senimi artyp kele jatyr. Al bul degenińiz, Mırzıóevtyń kókeıindegi eń basty maqsat. Óıtkeni halyq bılikke senbegen jerde eshqashan bereke bolmaıdy. Árbirden soń, ekonomıkany damytyp, memleketti alǵa súıreıtin qýat bıliktiń emes, halyqtyń boıynda. Áleýmet ál jıǵan saıyn onyń bereri de arta túsedi. Al eger bılik bardy baýyryna basyp alyp, halyqty aldarqatýǵa kóshse, onyń arty mindetti túrde bir bálege aparyp tireıdi. I.Karımov oqystan kóz jumbaǵanda, Ózbekstan da osyndaı bir qaterge urynýy ábden múmkin edi. Ózbek jurtynyń baǵyna qaraı, bılikke Mırzıóev keldi. Qyzyǵasyń. Qyzyqpaý múmkin be?

Sansyzbaı Nurbaba