Mońǵolıanyń jańadan jasaqtalǵan mınıstrler kabınetine Baıan-Ólgıı aımaǵynan Parlamentke saılanǵan depýtat, qandasymyz Áýbákir Tileýhanuly enip otyr. Ol Otbasy, eńbek jáne áleýmettik qorǵaý mınıstri laýazymyna taǵaıyndalýy tıis.- dep habarlaıdy Qamshy.kz e-history.kz saıtyna silteme jasap.

Áýbákir Tileýhanuly — Mońǵolıa Memlekettik Uly Hýralynyń (Parlamentiniń) depýtaty. 1976 jyly Selenge aımaǵynda dúnıege kelgen. 1992 jyly Sagaannýýr somonyndaǵy orta mektepti támamdaǵan. 2000 jyly Ulan-Bator qalasyndaǵy Otgontenger ýnıversıtetin halyqaralyq quqyq mamandyǵy boıynsha bitirip, bakalavr dárejesin alǵan.

Eńbek jolyn Selenge aımaǵyndaǵy «Selenge tarıa» JSHS-de dırektordyń orynbasary qyzmetinen bastaǵan. 2008–2015 jyldary Baıan-Ólgıı aımaǵyndaǵy Áleýmettik demokratıa – Mońǵolıa jastar odaǵynyń tóraǵasy bolǵan. Al 2015–2019 jyldar aralyǵynda eldiń keden basqarmasynda ishki aýdıt jáne baqylaý bóliminiń basshysy, sondaı-aq keden bólimi basshysynyń orynbasary qyzmetterin atqarǵan.

2020 jyldan beri Memlekettik Uly Hýraldyń múshesi. Endi ol mınıstrler kabınetiniń jańa quramynda áleýmettik salaǵa jaýapty mınıstr retinde qyzmetke kirisýi múmkin.

Aıta keteıik, 3 maýsym kúni Mońǵolıanyń sol kezdegi premer-mınıstri Lývsannamsraın Oıýýn-Erdene otstavkaǵa ketken bolatyn. Onyń ornyna 13 maýsymda Gombojav Zandanshatar premer-mınıstr qyzmetine kiristi. Jańa úkimet quramyn Zandanshatar búgin Uly Hýral depýtattaryna tanystyrdy.