Ratel.kz saıtynyń jumysy ýaqytsha toqtatylyp, bas redaktory Marat Ásipov kúdiktiler qataryna ilikti. Bul týraly Ratel.kz jýrnalısi Vadım Boreıko Facebook-tegi paraqshasynda jazdy.

«Marat Ásipov 8 saǵatqa sozylǵan tergeýden shyqty. Saıt qyzmetkerleri Sapa Mekebaev pen Anna Kalashnıkova da tergeledi ári kúdikti dep tanylýy múmkin», - dep jazdy Vadım Boreıko.

Al Ratel.kz saıty ment Forbes Kazakhstan jýrnaly redaksıalaryn tintý kezinde ustalyp, keıin bosatylǵan Forbes.kz jýrnalısi Aleksandr Vorotılovtyń mártebesi ázirge belgisiz.

Eske sala keteıik, jýrnalıserdi redaksıadaǵy tintýden soń ustaǵan edi. Almaty polısıasy bul áreketin eki aqparat quraly «ádeıi jalǵan málimet taratady» delingen «azamat K» aryzymen baılanystyrdy. BAQ-tyń dereginshe, «Azamat K» - burynǵy memlekettik kirister mınıstri, kásipker Zeınolla Kákimjanov. Kákimjanov ótken jyly atalǵan basylymdarmen sottasyp, olardan 50 mln teńge óndirý shaǵymyn jeńip shyqqan. Al Kákimjanovtyń jemqorlyq sqemasyn áshkerelemek bolǵan jýrnalıser sottyń bul sheshimimen kelispedi.

Polısıa Forbes Kazakhstan redaksıasyn tintigen soń, Vorotılovtyń jumys kompúterin alyp ketti. Ótken aptada buǵattalǵan Ratel.kz saıtynyń redaksıasynan da kompúterler men qujattar alynǵan.

Kákimjanov Facebook áleýmettik jelisindegi paraqshasynda ózine qarsy maqalalardy «tapsyryspen jazylǵan» dep atady.