Almaty telearnasynyń basshysy Álibek Áldeneı áleýmettik jelide halyqtan keshirim surap, málimdeme jasady. Arna basshysynyń keshirim suraýyna 4 sáýir kúni «Almaty» telearnasyndaǵy «Aqsham Alań» baǵdarlamasynda aqyn Muhtar Shahanovtyń XX ǵasyrdaǵy qazaqtyń ómirden ótken uly esimderine qarata aıtqan sózderi sebep bolǵan.

«Baǵdarlamada ıisi qazaq tóbesine tutqan uly tulǵalar - iri epık jyraý Jambyl atamnyń, qazaq ádebıetiniń klassıgi, uly jazýshy Muhtar Áýezov atamnyń, qazaq poezıasynyń alyby Muqaǵalı Maqataev atamnyń arýaǵynan, qazaq ádebıeti tarıhynda ózindik orny bar qaıratker, aqyn aǵam Nurlan Orazalınniń ózinen, aıtylǵan qısynsyz oı-pikirler úshin keshirim ótinemin!

«Jańylmaıtyn jaq, súrinbeıtin tuıaq bolmaıdy» deıdi qazaq. Bizdiń taraptan osyndaı jańsaqtyq ketti...  Qoǵam qaıratkerlerin efırge shaqyrǵandaǵy maqsatymyz - qoǵamǵa úlgi bolar oı taratý. Zıaly qaýym ókilderi qashanda halyqty tárbıeleýshi, asyl sózdiń qazynasy, tereń paıym ıesi dep sanaımyz.», - deıdi telearna basshysy.

Bir aıta keterligi, Shahanov Almaty arnasynyń efırine deıin-aq, 1 sáýirde taratqan málimdemesinde Muhtar Áýezov, Sábıt Muqanov, Qadyr Myrzalıev, Muqaǵalı Maqataev, Jambyl Jabaev sıaqty tulǵalardyń adamı bolmysyna syn aıtyp, olardyń tarıhtaǵy beınesine kúmán keltirgen edi. Ári osy málimdemesin jurttyń synyna qalǵan.

Árıne halyq tóbesine kótergen, qoǵamǵa, memleketke aty tanylǵan tulǵalardyń aýzyna qaqpaq bolý qandaı da bir BAQ basshysynyń mindeti emes. Birer jyldyń ishinde-aq «Almaty» arnasynyń boıyna qan júgirtken Álibek Áldeneı tikeleı qatelik ótkizbese de, Qazaq tóbesine kótergen azamattyń artyq-aýys pikiri úshin telearna basshysy retinde kishireıip,  «Eń qıyny, osy bir ábes áńgime, jel sóz el arasyna iritki salmasa, qalǵan qańqý sózge tamyzyq bolyp ketpese degen adal nıetpen, aq kóńilmen osy sózderdi jazyp otyrmyn...» ,- dep alańdaıdy.