AQSH-taǵy saılaýǵa Reseıdiń qatysy bar-joǵyn tekserip júrgen arnaıy prokýror Robert Múller reseılik olıgarhtardy tergeı bastady. Bul týraly 4 sáýirde CNN habarlady.

Derekterge súıensek, bir reseılik mıllıarderdi Nú-Iorkke jeke ushaǵymen qonǵan sátinen-aq ustaǵan. Ony tergep, elektrondyq qurylǵylaryn túgel teksergen. AQSH-qa saparlap kelgen ekinshi olıgarhty da tergedi. Al Múllerdi qyzyqtyrǵan úshinshi mıllıarder kópten beri AQSH-qa kelmegen. Oǵan amerıkalyq arnaıy prokýrorlarmen «áńgimelesý týraly usynys» jiberildi.

Reseılik olıgarhtardyń kim ekeni jáne olardyń AQSH-qa qashan barǵandary belgisiz. CNN deregi boıynsha, bul áreketter tergeýshilerde reseılik azamattardyń Tramptyń saılaýaldy kampanıasyn tikeleı nemese janama qarjylaı demeýshilikpen aınalysqanyna qatysty qujattar baryn aıǵaqtaýy múmkin. Amerıka zańyna sáıkes, AQSH-taǵy sheteldik azamattar ondaı demeýshilik jumystarmen aınalysa almaıdy. Múller reseılikterdi Trampqa aqsha aýdarý múmkin dep kúdiktenip otyr.

Eske sala keteıik, 16 aqpanda amerıkalyq Ádilet mınıstrligi 2016 jyly AQSH-taǵy prezıdent saılaýyna aralasqan kúdiktilerdiń tizimin jasady. Tizimge Reseıdiń Evgenıı Proıgojın bastaǵan 13 azamaty jáne úsh kompanıasy kirdi. Alaıda byltyr qarashada Prıgojın saılaý kampanıasyna esh qatysy joq ekenin aıtqan.