Mamyrdyń 16-18-i kúnderi aralyǵynda Qyzylordada Qazaqstannyń eńbek sińirgen qaıratkeri, ánshi-kompozıtor Batyrhan Shúkenovti eske alýǵa arnalǵan  «Otan-Ana» İİ respýblıkalyq ánshiler konkýrsy ótedi. Astana qalasynyń 20 jyldyǵy men Qyzylordanyń 200 jyldyǵyna tuspa-tus kelgen bul baıqaýdy Qyzylorda oblysy ákimdigi qoldap otyr.

Respýblıkalyq baıqaýǵa 18-30 jas aralyǵyndaǵy ánshiler qatysa alady. Qatysýshylardyń óner kórsetý rettiligi aldyn-ala jerebe tańdaý arqyly anyqtalady. Baıqaýdyń basty ereksheligi  ánshilerge mınýsovkada bek-vokaldy qoldanýǵa ruqsat berilmeıdi. Konkýrstyń birinshi kezeńinde talapker  erkin taqyryptaǵy  ándi  fonogrammen  (mınýs-1) oryndasa, İİ kezeńde B.Shúkenovtiń ánin  ınstrýmentaldy ansámbldiń súıemeldeýimen aıtýy tıis. Qatysýshylardyń ónerin baǵalaıtyn qazylar alqasynyń quramynda belgili kásibı mýzykanttar, kompozıtorlar, óńdeýshiler men mádenıet jáne óner qaıratkerleri bolady. Reseıden tanymal mýzykanttar men belgili tulǵalar arnaıy qonaqqa kelmek.

Konkýrsty uıymdastyrýshy: Qyzylorda oblysy mádenıet, arhıvter jáne qujattama basqarmasy jáne «Tańdaý» prodúserlik ortalyǵy.

Konkýrsqa qatysý týraly ótinimderdi 2018 jyldyń 20 sáýirine deıin Almaty qalasyndaǵy «Tańdaý» prodúserlik ortalyǵy men  Qyzylorda oblystyq halyq shyǵarmashylyǵyn damytý jáne mádenı-prodúserlik ortalyǵyna jiberý kerek.

Qyzylorda qalasy, Qorqyt Ata kóshesi, 78. Oblystyq halyq shyǵarmashylyǵyn  damytý jáne mádenı-prodúserlik ortalyǵy, 8/7242/ 27-76-33,  27-26-56, + 7 705 863 80 70, +7 702 914 14 34, email:  zhdclub@mail.ru

«Tańdaý» prodúserlik ortalyǵy, tel: 8(7273 ) 78-91-04, +7 701 949 19 33, +7 701 111 20 99 email: otan_ana_2018@mail.ru  

18-mamyr konkýrs talapkerleriniń qatysýymen ashyq aspan astynda Batyrhan Shókenovty eske alýǵa arnalǵan Gala-konsert bolady. Dál osy kúni Batyrhan Shúkenovtiń eskertkishi qoıylyp, as beriledi. Sonymen qatar, ónerpazdar tal otyrǵyzyp, qalany kógaldandyrý jumystaryna atsalysady. Baıqaý tuńǵysh ret 2016 jyly ótip, oǵan 27 ónerpaz qatysqan edi.