Qazaqstan boıynsha kóktemgi ásker qataryna shaqyrý jumystary qyzý júrgizilip jatyr. Almaty oblysynyń Qorǵanys isteri jónindegi departamenti de áskerge shaqyrý naýqanyna belsene atsalysýda. Ústimizdegi jyldyń kóktem aıynda Jetisý jerinen 1991-2000 jyly týylǵan 1800-den astam azamat áskerge qataryna alynady.
Búgingi kúni 300-ge jýyq azamat QR UQK Shekara qyzmetiniń áskerı bólimderine attandyrylǵan.
Jergilikti áskerı basqarý organdarynyń, densaýlyq saqtaý jáne qurylymdyq kúshterdiń ókilderinen quralǵan shaqyrý jáne medısınalyq komısıasy áskerge qabyldanýshylardy túbegeıli tekserýden ótkizýde. Komısıa músheleri ár úmitkerdi dara qarastyryp, alǵan bilimin, mamandyǵyn, otbasy jaǵdaıyn, qyzyǵýshylyqtaryn, sporttaǵy jetistikterin nazarǵa ala otyryp, densaýlyq jaǵdaıyna qaraı merzimdi ásker qataryna qabyldaý týraly sheshim shyǵarady.
-Jetisý jeriniń azamattary QR Qarýly Kúshterde, UQQ Shekara qyzmetinde, Prezıdenttiń Memlekettik kúzet qyzmeti, sondaı-aq QR İİM Ulttyq Ulannyń qatarynda áskerı boryshtaryn ótep keledi. Áskerı bólim men mekeme basshylary árqashan Almaty oblysynan qabyldanǵan azamattardyń erik-jigeri men Otanǵa degen patrıottyq sezimderiniń joǵary ekenin erekshe atap otyrady, - dedi Qorǵanys isteri jónindegi departamenti bastyǵynyń mindetin ýaqytsha atqarýshy podpolkovnık Talǵat Dáýlethanov.
Kóktemgi áskerge shaqyrý naýqany ústimizdegi jylǵy 10 naýryzda bastalyp 30 maýsymda aıaqtalady. Ádettegideı áskerdi jasaqtaý aýmaqtyq prınsıpke negizdeledi, ıaǵnı ásker qataryna qabyldanýshy ózge oblysqa attandyrylady. Azamatardy qabyldaýda jáne irikteýde olardyń osyǵan deıin alǵan bilimderi eskeriledi.
Málimet úshin: Áskerge shaqyrý «Áskerı qyzmette bolýdyń belgili merzimin ótegen áskerı qyzmetshilerdi zapasqa shyǵarý jáne QR azamattaryn 2018 jylǵy naýryz – maýsym men qyrkúıek – jeltoqsan aılarynda kezekti merzimdi áskerı qyzmetke shaqyrý týraly» QR Prezıdentiniń 2018 jylǵy 28 aqpandaǵy №644 Jarlyǵyna sáıkes júrgiziledi.
«Áskerı qyzmet jáne áskerı qyzmetshilerdiń mártebesi týraly» QR Zańyna sáıkes merzimdi áskerı qyzmetke 18 ben 27 jas aralyǵyndaǵy, merzimin keıinge qaldyrýǵa jáne áskerden bosatylýǵa quqy joq azamattar qabyldanady.
