Nursultan Nazarbaev Astanaǵa qatysy joq adamdardyń esimi berilgen kóshelerdiń atyn aýystyrýdy tapsyrdy dep, habarlaıdy Qamshy.kz aqparat agenttigi.

«Astanadaǵy kóshe ataýlary adamdy adastyrady. Bir kóshe, bir kósheniń ár jerinde túrli ataýlar. Muhamedhanov, Saraıshyq, Qoshqarbaev - bir kóshe bolsa, Orynbor, Syǵanaq, Qaldaıaqov - basqa kóshe, munykim bulaı jasaǵan? Poshtashynyń ózi shatasady. Kóshe ataýlaryn retke keltirýdi tapsyryp edim ǵoı. Bul ataýlardy kim bergen, bilmeımin. Ádilbek Ryskeldiuly ma, álde oǵan deıingiler me? Qalaı bolsa solaı. Qalaǵa, tipti, elge bul adamnyń qatysy bar ma, joq pa?, - dedi Nursultan Nazarbaev.

Astana ákiminiń orynbasary Ermek Amanshaev onomastıkalyq komısıanyń quramyna tanymal ǵalymdar men tarıhshylar kiretinin aıtty.

«Olar ne túsinedi? Biz qalada turamyz. Eger adamnyń atyn bermeseń, nómirle. 13-dańǵyl dep, osylaı durys emes pe? Mysaly, qazir Vashıngtonda barlyq kóshe nómir boıynsha ǵana júıelengen. Men munyń ne ekeninen beıhabarmyn. Bir kezderi Tasmaǵanbetovke (kóshelerge - red.) Saraıshyq, Syǵanaq sıaqty tarıhı astanalardyń esimin berýge ruqsat etkenmin», - deıdi prezıdent.

Sonymen birge Nursultan Nazarbaev Astanadaǵy kóshelerdiń birine aty berilgen Muhamedhanov degen adamnyń kim ekenin surady.

«Tanymal akademık, abaıtanýdyń negizin qalaýshylardyń biri», - dep jaýap berdi Ermek Amanshaev.

«Abaıtanýshy, áýezovtanýshy, taǵy birdeńe ... tanýshy. Astana kóshelerine báriniń esimin bere  beresiń be? Onyń qalaǵa qandaı qatysy bar?» - dedi Nazarbaev.

«Astanaǵa qatysy joq adamdardyń esimi berilgen kóshelerdiń atyn aýystyryńdar. Adamdardy shatastyryp, kóshe attaryn aýystyra bergennen paıda joq, biraq sonda da tártip ornatyńdar. Taǵy qaıtalap aıtamyn, kóshelerdi nómirleı salyńdar, boldy, - dedi prezıdent.