Qamshy.kz aqparat agenttiginiń hat qorjynyna «Turan Álem Bankiniń» burynǵy basshysy Erjan Tátishevtiń otbasy atynan hat keldi. 2004 jyly 38 jasynda ań aýlaý kezinde qaza tapqan Tátishevke qatysty derekter 13 jyldan keıin qaıta qaralady. Nátıjesinde, Murathan Toqmádı Erjan Tátishevti atyp óltirgenin moıyndap, sot ony 10,5 jylǵa bas bostandyǵynan aıyrǵan. Osy oqıǵaǵa qatysty otbasynyń jazǵan hatyn nazarlaryńyzǵa usynamyz.

***

Ýaqytqa tótep bergen tóreshi – ol ádildik.

Ómirden erte ozǵan Erjannyń júregimizdegi ǵumyry máńgi bola bermek.

Kóp kútken úkim kúshine enip, qylmyskerler óz kinásin moıyndaǵan bul kúnde ıyq súıesip, bizdermen birge ádil zańǵa úmit artyp, osy kúreste qoltyǵymyzdan súıep, demeý bolǵan izgi nıetti adamdarǵa alǵys aıtqymyz keledi. Bul kúres tabany kúrekteı 14 jylǵa sozylyp, aqyry ádildik ýaqyttyń ózine tótep berip, tóreligin aıtty.

Sergeldeńge salǵan osy jyldar boıy qóńilimiz qulazyp, qabyrǵamyz qaıysty. Jan túrshigerlik jaýyz qylmystar zor mártebe, qudiret-mansap, qısapsyz aqshanyń tasasynda qalyp, saıasat syltaýymen jyly jabylyp kelgeni janymyzǵa batty. Biraq, bizderdeı zań kúshine senip, shyndyq úshin kúresken tileýlester dáıim janymyzdan tabylyp keldi. Aqyry aq-qarasyn aıyrǵan ádil tergeý, ashyq sot shytyrmannyń shıesin tarqatyp, jaýyzdar jazasyn aldy.

Qolmen istegendi moıynmen kótermek kerek. Eshkim de zań quryǵynan qutylmaıdy. Erjanǵa qarsy qylmystarǵa qatysy bar qandyqol qaraqshylardyń bári de sazaıyn tartatynyn bilemiz hám senemiz. Árıne, bul senim qazanyń ornyn toltyryp, qasiretten aryltpas, alaıda, abzal ul, aǵa, jar, áke bolǵan aıaýly jannan aıyrylǵan jaradar qóńilderdi jubatyp, jylaýly kózderdiń jasyn tyıýǵa sep bolary anyq.

Mine, búginde ádildik izdep alasurǵan barsha jandarǵa bizdiń aıtarymyz: tuıyqqa tireldik dep, toqtamańyzdar. Maqsatqa jetpeı, tynbańyzdar. Ózgeler kúder úzse de, kúrese berińizder. Kúresken jeter muratqa!

Tátishev januıasy!