Psıhologtar "Barbı qýyrshaǵyna uqsaǵysy keletin boıjetkender "sulýlyq" sózin durys túsinbeıdi" degen pikirde. Bir qyzyǵy, bilikti fotomodelder "tiri" Barbılerdiń basynda taza aýadan basqa eshteńe joq dep boljaıdy.
Álemde qýyrshaqqa uqsaǵysy keletin qyzdar bar. Sánqoılar Qazaqstanda da tabylady. Lınzanyń kómegimen kózdiń qarashyǵyn "ulǵaıtý", japsyrma kirpikter men jarqyn opa-dalap biraz almatylyqtyń talǵamyna saı kelgen.
Qýyrshaq beınesi sándi bolǵany sonshalyqty, alyp shaharda meıkap jasaıtyn mamandar óz qyzmetteriniń tizimine atalǵan stıldi engizgen. Al dúken sórelerinde kózdegen maqsatqa tezirek jetip, "tiri Barbı" atanýǵa qajetti zattardyń bári paıda boldy.
"Bári dúkennen qubylmaly tústegi kirpikterdi kórip, satyp alýymnan bastaldy. Sonymen qatar, vızaj jasaý qolymnan kelgendikten, "bul kirpik arqyly qandaı makıaj jasaýǵa bolady?" degen suraq týyndady. Men synaq retinde syrt kelbetime Barbıdiń beınesin jasaýǵa tyrystym. Biraq túıgenim, tek erekshe jaǵdaıda bolmasa, kúndelikti ómirde bulaı júrý qajet emes. Al ota jasaý arqyly qýyrshaq keıpine engisi keletin qyzdardyń oıynda túk joq", - dedi model Marıa Kolenko.
Suranys usynysty týdyrdy. Qazaqstanda úlken kólemdegi lınzalardy tabý qıyndyqqa soqtyrmaıdy. Dese de, sán qýý taqyrǵa otyrǵyzýy múmkin. Mamandardyń sózinshe, bir qaraǵanda san soqtyrmaıtyn aksesýarlar shyǵynǵa batyrýy ǵajap emes.
"Bizde 500 túrli lınza bar. Olardyń sýretteri, tústeri men dızaındary san túrli. Boıjetkender lınza tańdaǵanda muqıat bolǵandary abzal. Kontrafaktilik ónimderdi satyp almaǵandary jón. Sebebi jasandy dúnıeniń tıgizer zıany kóp. 16, 17 nemese 22 mıllımetr kólemindegi lınzalardy elimizde qoldanýǵa ruqsat berilse (biraq men ózim kórmedim), ol tutynýshynyń tańdaýy. Eger bul kontrafaktilik jáne kontrabandalyq ónim bolsa, adamnyń densaýlyǵyna qaýipti, ıaǵnı kózdiń kórý qabiletin nasharlatyp alýy múmkin", - dedi lınza satýmen aınalysatyn kompanıa ókili Bahtıar Ábdirahımov.
Onyń aıtýynsha, olarda qyzmet kórsetetin keńesshiler klıentterge lınzany durys qoldaný týrasynda málimet beredi. Ábdirahımov úlken kólemdegi lınzalarǵa qyzyqpaýdy eskertedi. Onyń aıtýynsha, kózdiń qarashyǵyn ulǵaıtatyn lınzalardyń maksımaldy kólemi 15 mm-den aspaýy tıis.
Bul týraly kóptegen qyzdar bilmeıdi. Sonymen qatar, úlken lınzany taqqan qyzdardyń kóz qarastary sýyq jáne jansyz bolady. Psıhologtyń pikirinshe, mundaı ajar minsiz sán týraly burmalanǵan túsiniktiń nátıjesi bolyp tabylady.
"Ata-analar balalaryna asa nazar aýdarýlary tıis. Balanyń ómirlerinen habardar bolý kerek. Ózine senimdi ári jeke basyna jáne qoǵamǵa durys baǵa bere alatyn bala ósirý qajet. Ózin mysalǵa ala otyryp, ár adamnyń jaratylysy ár túrli ekendigin túsindirgen durys. Adam ózge adamnan meıkap arqyly emes, oı órisi, is-qımyly arqyly ereksheletindigin jetkizgen jón", - dedi psıholog Elena Manjıkova.
Onyń aıtýynsha, árkim óz keıpin saqtap qalý arqyly da baqytty bola alady. "Almaty" arnasy
