QR İshki ister mınıstri Qalmuhambet Qasymov búgingi Úkimet saǵatynda shetel azamattarynyń elimizde tirkelý jáne vıza alý máselesine qatysty toqatlyp ótti, dep jazady Qamshy.kz aqparat agenttigi.
Mınıstrdiń aıtýynsha, ár memleket azamattarynyń elimizge kelý jáne tirkelý rásimi ár túrli
"Qazaqstanǵa kirý úshin olardyń kóbine vıza kerek. Jalpy azamattyq pasportpen vızasyz kirýge qatysty 19 memleketpen kelisim jasalǵan. Olardyń qatarynda Eýrazıa ekonomıkalyq odaǵynyń elderi de bar. 45 eldiń azamattary osy kúnge deıin vıza rásiminen tirkelýden bosatylǵan. 2016 jyldan bastap qytaı azamattarynyń Qazaqstanǵa toptyq týrısik saparyn jeńildetý týraly memorandým kúshine endi", - deıdi mınıstr.
Aıta ketsek, sheteldik ınvestorlar úshin elimizde erekshe jaǵdaılar jasalynǵan eken. Mınıstrdiń dereginshe, ınvestorlyq vıza úsh jylǵa beriledi, olarǵa bizdiń kóshi-qon qyzmetine tirkelý talap etilmeıdi.
"Sońǵy jyldary biz shetel azamattaryn tirkeý rásimin birshama jeńildettik. Ekonomıkasy damyǵan jáne saıasaty turaqty 56 eldiń azamattary shekaradan ótken boıda keden qyzmetine tirkele alady. Bul olardy mıgrasıa qyzmetine kelip tirkelýden bosatady. EEO men Tájikstan elderiniń azamattary erekshe mártebege ıe, olar shekaradan ótkennen bastap otyz kúnge deıin tirkelýden bosatylady. EEO elderiniń azamattaryna bizdiń elde jumys jasaý úshin ruqsat kerek emes. Ótken jyldan bastap shetel azamattaryn qabyldaıtyn barlyq zańdy jáne jeke tulǵalar olardy elektrondyq úkimettik portal arqyly tirkeýge múmkindik aldy", - dep atap ótti Qasymov.
