Italándyq «Iveco» kompanıasy Almaty baǵyttarynda gazben júretin avtobýstardy kórsetti. Bul tómen edendi avtobýs, uzyndyǵy 12 metr, kondısıonermen, pandýspen, vıdeokameramen jabdyqtalǵan, syıymdylyǵy 100 jolaýshyǵa deıin.

Qalanyń Jolaýshylar kóligi jáne avtomobıl joldary basqarmasynyń basshysy Maqsut Isahov gazben júretin avtobýs úsh aı boıyna «Qazaqstan» qonaq úıinen «Medeý» muz aıdynyna deıin baratyn №12 baǵytqa qyzmet kórsetetinin aıtty.

«Atalǵan markaly avtobýstar álemdik naryqta ózderin jaqsy qyrynan kórsetti, degenmen biz ony Almaty jaǵdaıynda tekserip kóremiz, sondyqtan júktemeni anyqtaý úshin osy baǵyt tańdap alyndy. Almaty ákiminiń tapsyrmasy boıynsha qalada kólik reformasy aıasynda gazben júretin avtobýstarǵa qatysty qajetti ınfraqurylym jasalýda, júıeniń ashyqtyǵy qamtamasyz etilgen, Alataý aýdanynda 200 avtobýsqa arnalǵan avtopark qurylysy júrýde, sondyqtan óndirýshiler qyzyǵýshylyq tanytýda. Baǵasyna, sapasyna qatysty barlyq málimetter jınalǵan soń tasymaldaýshylar belgigi markaly avtobýstardy alatyn bolady», - dedi ol.

«CNH Industrial» óńirlik menedjeri Roberto Bonzo avtobýstyń Almatyǵa Eýropadan ákelingenin jáne barlyq joǵary sapaly standarttarǵa saı ekenin atap ótti.

«Eger Almaty tasymaldaýshylary bizdiń markany qalasa, Qostanaı qalasyndaǵy zaýytta jasalyp, qurastyrylatyn otandyq avtobýstardy usynamyz. Munda tıisinshe utymdy baǵa men shartty jaǵdaılar da bolady», - dedi «SaryarkaAvtoProm» JSHS-tiń basqarýshy dırektory Orýdj Nazarov.

Eske salsaq, №12 baǵytynda gazben júretin «Mercedes-Benz» markaly avtobýs da testen ótýde.