Qazaqstannyń Syrtqy ister mınıstri Qaırat Ábdirahmanov Túrkıaǵa jasaǵan resmı sapary barysynda osy eldiń memleket basshysy Rejep Taıyp Erdoǵannyń qabyldaýynda boldy. Bul jaıynda 24.kz habarlady.

Ekijaqty kezdesýde syrtqy ister vedomstvo jetekshisi Túrkıa prezıdentine Elbasynyń sálemi men ıgi tilekterin jetkizdi. Óz sózinde Taıyp Erdoǵan Qazaqstan kóshbasshysynyń aldaǵy ýaqytta túrik eline josparlanǵan sapary aıasynda birqatar ekonomıkalyq kelisimshartqa qol qoıylatynyn atap ótti.

Taraptar kólik, aýylsharýashylyǵy, kishi jáne orta bıznes pen týrızm salalarynda yntymaqtastyqtyń kókjıegin keńeıtýge nıet tanytyp otyr. Basqosýda halyqaralyq jáne aımaqtaǵy ózekti máseleler de nazardan tys qalmady. Qos memleket Sham elindegi shıelenisti sheshýde Astana prosesiniń rólin biraýyzdan joǵary baǵalaıtynyn aıtyp, bul baǵyttaǵy keleli kelissóz jalǵasa beredi dep sendirdi.

Sonymen qatar Qaırat Ábdirahmanov Túrkıa Uly ulttyq májilisiniń tóraǵasy Ismaıyl Kahramanmen de kezdesti. Otyrysta taraptar parlamentaralyq baılanystardy nyǵaıtý máselelerin talqylady. Syrtqy ister mınıstri Qazaqstannyń BUU Qaýipsizdik Keńesiniń turaqty emes múshesi bolyp saılanýyna jáne elimizdiń halyqaralyq bastamalaryna qoldaý bildirgeni úshin túrik úkimeti men májilis tóraǵasyna alǵysyn bildirdi.