Almaty ákimi Baýyrjan Baıbek qalanyń barlyq merdigerlik uıymdarynyń qatysýymen aldaǵy ýaqytta megapolıstiń kóshe-jol jelilerin jóndeý máselesine qatysty keńeıtilgen keńes ótkizdi. Almatyda 2018 jyly 157 kósheni jóndeý, sonymen qatar Maqataev, Baıtursynov jáne Jarokov kóshelerindegi uzyndyǵy 15,7 shaqyrym bolatyn tramvaı joldaryn demontajdaý josparlanǵan.

Jıyn barysynda qalanyń Jolaýshylar kóligi jáne avtomobıl joldary basqarmasynyń basshysy Maqsut Isahov barlyq jóndeý jumystarynyń 2018 jyldyń qarasha aıynda aıaqtalatyny jáne 24 kóshe bordúrleriniń tolyq jańaratyny, kóshelerdiń 43 paıyzynyń jeke bólikteriniń qaıta jasalatyny týraly habarlady.

Óz kezeginde megapolıs ákimi basqarma jasaǵan jospardy qatal synǵa alyp, jumystyń naqtyly kestesin jasaı otyryp, jobalaý ádisterin qaıta qaraýdy tapsyrdy.

«Biz Almatyny «Qala – adamdar úshin jaıly» qaǵıdasy boıynsha damytýdamyz, sondyqtan jumystardy júrgizgen kezde kedergilerdi barynsha azaıtyp, ýaqyttty qysqartqan jón. Ótken jyly joldardy jóndeý, jylý trassalaryn jańartý, ortalyqty jańǵyrtý jóninde aýqymdy jumystar júzege asty, degenmen proses barysynda birqatar kemshilikter anyqtaldy, ásirese taım-menedjment boıynsha. Bıylǵy jylǵa jasalǵan josparda keıbir merdigerlerdiń jóndeıtin joldary nebári 5 shaqyrym, ony qarashaǵa deıin sozýdyń qajeti qansha. Qystyń aldynda tegis asfáltty jol kimge kerek», - dep renish bildirdi Baýyrjan Baıbek.

Ol merdigerlerdiń birneshe kún boıyna asfáltty alatyn,bordúrlerdi shyǵaratyn jáne asfált tóseýdi uzaqqa sozatyn eski ádisterden tolyq arylýyn qadap turyp aıtty.

«Jumysqa kirispes buryn jóndeletin ár kóshe boıynsha aqaýy kórsetilgen aktili fotoalbomdy usynyńyzdar. Jumysqa barynsha keshendi túrde qarap, árbir aspektini oılanyp baryp jasaý kerek. Merdiger keıbir jerlerde aryq naýalaryn aýystyrý, qorshaýlardy, qaraýsyz qalǵan baǵanalardy, beton konstrýksıalaryn, kereksiz jelilerdi, bir sózben aıtqanda barlyq vızýaldy qoqysty alyp tastaý qajet ekenin bilýi tıis, sonda ǵana is birneshe ret qaıtalap atqarylmaıtyn bolady. Onyń ústine burynnan bar jasyl jelekti barynsha saqtaǵan jón», - dedi Baýyrjan Baıbek.

Aıta keterligi, qalada burynǵysynsha durys ornalaspaǵan turaq qaltalary jetkilikti. Tipti, keıbir ýchaskelerde kólik ıeleri avtomobılderin buryshtap qoıyp, qozǵalys jelisiniń ótkizgish qabiletin tómendetip, apatty jaǵdaıǵa uryndyrady. Megapolıs basshysy jol jóndegende osy faktordy eskerýdi, turaq qaltalarynyń bergi betterin ǵana abattandyrýdy taprsyrdy.

Megapolıs ákimi jol jóndeý barysynda kóshelerdiń jabylatyn bólikteri týraly turǵyndarǵa der kezinde habarlaý kerektigin de aıtty.

«Qandaı jumystardyń júretini jáne qashan aıaqtalatyny týraly túsinik berý qajet. Kompanıa basshylarynyń baılanys nómirlerine deıin jazylǵan tolyq aqparaty bar stendiler ornatylýy tıis. Aqparattyq resýrstarda jumys kestesiniń bolǵany jón», - dedi ákim.

Baýyrjan Baıbek keńestiń jumysyn qorytyndylaı kelip, qalanyń Jolaýshylar kóligi jáne avtomobıl joldary basqarmasyna bir apta ishinde jospar jasaýdy, onda árbir merdiger uıymdardyń qandaı jumystardy qashan jáne qalaı júrgizetini, naqtyly merzimi kórsetilýi tıis. Ońtaılandyrylǵan jumys kestesi kelesi keńeste usynylýy qajet. Osyndaı tapsyrma qalanyń energetıka jáne komýnaldy sharýashylyq basqarmasyna da berildi.