Almaty ákimi Baýyrjan Baıbek jumys sapary barysynda qaıta jasaýǵa qatysty daıyndyqtar júrip jatqan «Ońtústik- Iýjnyı» saıabaǵyn aralap kórdi. Saıabaq Jarokov kóshesiniń shyǵysy men Hodjanov kóshesiniń soltústigine qaraı 14,2 gektar aýmaqty alyp jatyr.
Qalanyń Tabıǵı resýrstar jáne tabıǵatty paıdalanýdy retteý basqarmasynyń basshysy Áset Masabaev joba boıynsha jaryq kózderin jańartý, fontandar jasaý, oryndyqtar men ýrnalar qoıý, burynnan bar aryqtardy jańartý, sonymen qatar balalar men sport alańdaryn, saıabaq permıetrine oraı velojoldar jasaý qarastyrylǵanyn aıtty.
Alaıda, megapolıs ákimi zamanaýı tendensıalar men turǵyndardyń talaptaryna saı qolda bar jobaǵa túzetýler engizý qajettigin atap ótti.
«Munda halyqtyń barlyq toptaryna - sábıdiń arbasyn súıregen analarǵa, balalarǵa, tynyshtyqty qalaıtyn eresek jandarǵa demalý jaıly bolýy tıis. Bul kóńil kóteretin emes, durys demalatyn oryn, sondyqtan asfáltty alańdy qysqartyp, burynnan bar tóte jáne jińishke joldardy qaıta jasyldandyryp, barynsha qolaıly ári kóleńkeli keńistik jasaǵan jón jáne úlken sáýlet pishindegilerdiń ornyna shaǵyn lokaldi jaryq kózderin ornatý qajet. Sý ishetin fontandar, stasıonarly dárethanalar, eń bastysy ıtterdi serýendetetin arnaıy qorshalǵan alań bolýy mindetti», - dedi Baýyrjan Baıbek.
Almaty ákimi qaıta jasaýdyń basty qaǵıdasy burynnan bar jasyl jelekti saqtaýmen qatar jańasyn qalyptastyrý ekenin qadap turyp aıtty. Joǵaryda aıtylǵan barlyq usynystardy eskere otyryp, jobaǵa tıisti túzetýler engizý tapsyryldy. Jalpy, budan bylaı saıabaq aýmaǵynda qoǵamdyq qaýipsizdikti qamtamasyz etýge erekshe nazar aýdarylatyn bolady.
Jumys sapary barysynda Baýyrjan Baıbek Medeý aýdanyndaǵy Oqýshylar saraıynda da boldy. Almaty ákimi burynnan bar jobany ońtaılandyrýdy jáne jasyl jelekke tıispeýdi tapsyrdy. Skverdi jańǵyrtý barysynda sýarý júıesin jańartý, kóshe jaryǵy baǵanalaryn jóndeý jáne basqa da sharalardy júzege asyrý mindetteldi.
