Batys Qazaqstan oblysynyń isker áıelderi H. Bókeeva atyndaǵy oblystyq qazaq drama teatrynda bas qosty.
Jıyn qyz-kelinshekter basshylyq etetin kásiporyndardyń ónimderi qoıylǵan kórmemen ashyldy. Kórmege «Balzıa», «Omarov torttary» kondıterlik sehtarynyń tátti taǵamdary, «Tumar» qolóner sheberhanasynyń buıymdary, «Marıa hanym» sán úıiniń kıimderi qoıyldy. Forýmnyń ashylý saltanatynda Batys Qazaqstan oblysy ákiminiń orynbasary Mırjan Satqanov, Oral qalasy ákiminiń orynbasary Mırbolat Nurjanov, «Atameken» QR Ulttyq kásipkerler palatasy oblystyq fılıalynyń dırektory Sáken Karın men palata janyndaǵy isker áıelder keńesiniń tóraıymy Juldyz Quspanova sóz alyp, el ekonomıkasynyń damýyna úles qosyp júrgen qyz- kelinshekterdiń jumysyna sáttilik tiledi.
– Barshańyzǵa belgili, Elbasynyń «Qazaqstan – 2050» strategıasynda elimizdegi shaǵyn orta bıznestegi ónimniń úlesin 50 paıyzǵa jetkizý kózdelgen. Óńirimiz sol údeden shyǵýǵa tyrysýda. Oblysymyzda qalypty jumys istep turǵan 48 myńǵa jýyq shaǵyn jáne orta kásipkerlik nysan bolsa, onyń 22 myńǵa jýyǵyn názik jandylar basqaryp otyr. Atalmysh kórsetkish búginde áıelderdiń kásipkerlik qyzmetimen aınalysýǵa degen belsendiligin kórsetedi. Sizderdiń kásipterińiz arqyly elimizdiń ekonomıkasy damymaq. Sondyqtan denderińizge saýlyq tileımin,- dedi oblys ákiminiń orynbasary Mırjan Satqanov.
Sáken Karın atalmysh forým qyz-kelinshekterdiń kásibine tyń serpin beretinin jetkizdi. – Biz sizderdiń kásipterińizdi damytýǵa múddelimiz. Qytaılyq «Alibaba» iri ınternet kompanıasynyń negizin salýshy Djek Ma óz jetistiginiń syry arýlar ekenin aıtqan. Óıtkeni olar ózderinen góri otbasynyń ózge múshelerine qamqor bolǵandy unatady. Bul forým bıznesterińizdiń damýyna jańa ıdeıa qosady dep senemiz, – dedi Sáken Karın.
Shara barysynda birqatar isker arýlar oblys ákiminiń atynan alǵysqatpen marapattaldy. Olardyń qatarynda «Balzıa» kondıterlik sehy men dúkender jelisiniń qojaıyny Balzıa Eveneeva, «Marıa hanym» sán úıiniń quryltaıshysy Marıa Quspanova, Batys Qazaqstan ınovasıalyq tehnologıalar ýnıversıtetiniń quryltaıshysy Lázzat Rysbekova, «Jaıyq Dent» stomatologıalyq ortalyǵynyń quryltaıshysy Merýert Mýsına, «Eset» sharýa qojalyǵy jáne«Zará Vostoka» bazarynyń basshysy Aıgúl Moldasheva bar. Forýmda el ekonomıkasynyń damýyndaǵy áıelderdiń róli, olardyń kásibin qoldaý jáne qoǵamdaǵy belsendiligin arttyrý taqyrybynda baıandamalar oqylyp, oblys ákimdigi men «Atameken» QR Ulttyq kásipkerler palatasy janyndaǵy isker áıelder keńesi ózara yntymaqtastyqty damytý týraly memorandýmǵa qol qoıdy.
