Batys Qazaqstan oblysynyń ákimi Altaı Kólginov 26 sáýir kúni Helsınkıge baryp, qalalyq ınfraqurylymdy damytý, qorshaǵan ortany qorǵaý jáne qaldyqtardy óńdeý salalary boıynsha fın tájirıbesimen tanysty.
Batys Qazaqstan oblysynyń ákimi Altaı Kólginov jumys saparymen Helsınkıge bardy. Oblys ákiminiń bul jolǵy shet memleketke jumys saparynyń maqsaty – energetıka jáne turaqty damý, qorshaǵan ortany qorǵaý jáne turmystyq qaldyqtardy qaıta óńdeý sekildi salalardyń qala ınfraqurylymyn damytýda qoldanylýy baǵytyndaǵy tájirıbelerdi saraptaý bolatyn.
Jumys sapary barysynda ákim Fınlándıa SİM memlekettik hatshysy orynbasary M.Keınánenmen kezdesti. Onda oblys ákimi Batys Qazaqstan oblysy boıynsha atqarylyp jatqan sharalar Elbasy belgilegen strategıalyq tapsyrmalar aıasynda júzege asyp jatqanyn aıtty.
Shara barysynda Fınlándıanyń «VTT» tehnologıalyq zertteýler ortalyǵynyń mamandary jasaqtaǵan tujyrymdamalar tanystyryldy. Ákim bul saparda sondaı-aq turmystyq qaldyqtardy óńdeý ortalyǵyna bas suqty.
Kezdesý barysynda Helsınkı men Batys Qazaqstan ákimdiginiń, Fın «Bıznes-hab» jobasy, «Collaprime» kompanıasy arasynda yntamaqtastyq jónindegi kelisimge qol qoıyldy. Bul óz kezeginde eki taraptyń «EKSPO-2017» kórmesi kezindegi kelisiminiń kelesi mańyzdy qadamy bolyp esepteledi. Aıta keteıik, buǵan deıingi BQO ákimdigi men «Collaprime» kompanıasy arasyndaǵy kelisim 3D-jobalaý baǵytynda kolej muǵalimderiniń biliktiligin arttyrýǵa baǵyttalǵan edi.
Qos tarap fındik BIM-tehnologıalary men 3D-jobalaý tehnologıasy oblystyń ınfraqurylymy men qurylysy salasyna oń áserin tıgizetinine senim bildiretinin jetkizdi. Aıta ketý kerek, «Collaprime» 2016 jyly Fınlándıanyń BIM-tehnologıalary boıynsha úzdik kompanıasy atanǵan.
