KHDR jáne Ońtústik Koreıa basshylarynyń samıtinen keıingi birlesken deklarasıaǵa sáıkes eki el qarym-qatynasyn  jaqsartady.

— Soltústik pen Ońtústik Koreıa  qarym-qatynasyn tolyq jáne jan-jaqty jaqsartýǵa, damytýǵa umtylatyn bolady.  Osylaısha eki el de gúldený men qaıta birigýge birlese jumys isteıdi , - delingen qujatta.

Aıta ketelik, búgin  KHDR prezıdenti men Ońtústik Koreıa prezıdenti demarkasıalyq jelide kezdesti. Kım Chen Yn shekaradan ótip, ońtústik aımaqqa attap basqan alǵashqy KHDR prezıdenti boldy.

Dıalogtyń birinshi kezeńi aıaqtalǵannan keıin Kım Chen Yn qarsylastyqty toqtatýǵa, al Mýn Chje In  eki el  arasyndaǵy temir jol qatynasyn ornatýǵa shaqyrdy.

Kúnniń ekinshi jartysynda taraptar Soltústik pen Ońtústiktiń arasyndaǵy qarym-qatynastardy jaqsartý, sonymen qatar birigý perspektıvalaryn talqylaýdy josparlap otyr.

Ótken aptada Kım Chen Yn KHDR ıadrolyq jáne zymyrandyq synaqtardy 21 sáýirden bastap toqtatty dep málimdedi.

Sonymen qatar Phenán ıadrolyq qarýdy qoldanýdan bas tartty. Jáne de Soltústik Koreıa ıadrolyq tehnologıalardy basqa memleketterge bermeýge ýáde berdi.

Ońtústik jáne Soltústik Koreıa arasyndaǵy qarym-qatynastardyń jaqsarýy Ońtústik Koreıanyń Phenchhandaǵy Olımpıadaǵa daıyndyǵy barysynda boldy.  Soltústik Koreıa sportshylarynyń Olımpıada oıyndaryna qatysýy, sondaı-aq Ońtústik Koreıaǵa Kım Chen Ynnyń ápkesi men Ońtústik Koreıa prezıdentiniń arnaıy ókilderiniń KHDR-ǵa sapary áser etti.