QR Premer-Mınıstrdiń birinshi orynbasary Asqar Mamın Dýshanbege jasaǵan jumys sapary aıasynda Tájikstan prezıdenti Emomalı Rahmonmen kezdesti, dep habarlaıdy QazAqparat tilshisi QR Premer-Mınıstriniń baspasóz qyzmetine silteme jasap.
Kezdesý barysynda ekijaqty yntymaqtastyqty odan ári damytý máseleleri talqylandy. QR Premer-Mınıstriniń birinshi orynbasary 2018 jylǵy naýryzda Astanaǵa resmı sapary barysynda eki Memleket basshylary Nursultan Nazarbaev pen Emomalı Rahmon qol jetkizgen kelisimder ekijaqty qarym-qatynastardy sapaly ári jańa deńgeıge kóteretinin atap ótti.
«Qazaqstan men Tájikstan Úkimetteriniń aldynda Memleket basshylary saýda deńgeıin 2 mıllıard dollarǵa jetkizý mindetin qoıdy», - degen Asqar Mamın atalmysh tapsyrmany oryndaý úshin qazaqstandyq tarap qajetti sharalardy qabyldaýǵa daıyn ekenin bildirdi.
Tájikstan Prezıdenti Emomalı Rahmon osy jyldyń 15 naýryzynda ótken Ortalyq Azıa memleketteri basshylarynyń konsýltatıvtik kezdesýiniń nátıjelerin joǵary baǵalady. Sonymen birge, ol osy forýmnyń óńirlik yntymaqtastyqty odan ári nasıhattaýdaǵy mańyzdylyǵyn atap ótti. Tájikstan Orta Azıa aımaǵyndaǵy Qazaqstannyń ekinshi iri saýda áriptesi bolyp tabylady. Naqtyraq aıtqanda, Ortalyq Azıa elderimen Qazaqstannyń taýar aınalymynyń 20 paıyzy osy elge tıesili. Sapar barysynda Asqar Mamın TR Premer-mınıstri Kohır Rasýlzodamen jáne Premer-mınıstrdiń birinshi orynbasary Saıd Davlataımen kezdesti.
Kezdesý barysynda ekijaqty yntymaqtastyqtyń mańyzdy máseleleri men Ortalyq Azıa Memleket basshylarynyń konsýltatıvtik kezdesý qorytyndysy boıynsha Hattamasyn júzege asyrý boıynsha mańyzdy sharýalar talqylandy. Ekonomıkanyń túrli salalarynda eki eldiń arasyndaǵy yntymaqtastyqtyń údemeli sıpatyn tilge tıek ete kele Asqar Mamın farmasevtıka, qurylys, azyq-túlik ónerkásibi, temirjol salasy, metalýrgıa, kólik quraý salasy sekildi 57 perspektıvti taýar pozısıalary boıynsha Tájikstanǵa tasymaldyń nomenklatýrasyn keńeıtý týraly aıtty.
Asqar Mamın saýda-sattyq aınalymyn arttyrý jónindegi jumys tobynyń qyzmetin belsendi ete túsip, osy salada Jol kartasyn ázirleýdi jáne ony Úkimetaralyq komısıanyń kezekti otyrysynda maquldaýdy usyndy. Kezdesý kezinde aımaqaralyq qatynastardy damytý, Qazaqstan Respýblıkasy men Tájikstan Respýblıkasynyń bıznes-qurylymdary arasyndaǵy tikeleı baılanystar, sondaı-aq eki eldiń eksporttyq áleýetin júzege asyrý máseleleri talqylandy.
Qazaqstan Respýblıkasynyń birinshi vıse-premeri Asqar Mamınniń Tájikstanǵa jasaǵan jumys sapary aıasynda Hyundai County markasynyń qazaqstandyq 300 avtobýsyn, 500 júk vagondy, 4 manevrlik jáne magıstraldik lokomotıvti jáne 5200 tonna R-65 relsterin, sondaı-aq aýqymy 30 myń tonnalyq Rogýsn GES-iniń qurylysy úshin «Arselor Mıttal Temirtaý» AQ óndiretin armatýralardy jetkizý boıynsha komersıalyq qujattarǵa qol qoıyldy.
