QR Aýylsharýashylyǵy mınıstrliginde Qazaqstannyń aýylsharýashylyq ónimderi qaı elderge ketip jatqany aıtyldy. Bul jaıynda Qamshy.kz aqparat agenttigi Tengrinews.kz saıtyna silteme jasap habarlaıdy.

Premer-mınıstr Baqytjan Saǵyntaevtyń aıtýynsha, qazir eksport salasynda qarqyndy damý baıqalady.

«800 taýar pozısıasynda 122 elge óz taýarlarymyzdy eksporttaımyz. 30 paıyzdyq ósim bar», - dep atap ótti Baqytjan Saǵyntaev úkimet otyrysynda.

«2017 jyly aýylsharýashylyq ónimderin eksporttaý isi 12,5 paıyzǵa ósti. Negizgi naryq – Ózbekstan, Aýǵanstan, Reseı, Tájikstan, Iran, Qyrǵyzstan, Túrkıa, Italıa jáne Latvıa elderi. Aýylsharýashylyq ónimderin eksporttaý kólemi ulǵaıyp keledi», - dep málimdedi QR Aýylsharýashylyǵy vıse-mınıstri Arman Evnıev.

Onyń sózinshe, negizinen bıdaı, un, maı, arpa, ósimdik maıy, maqta talshyqtary men burshaqqa suranys kóp.

«Búginde qytaı naryǵy balyq óndirý, qoı sharýashylyǵy, ara sharýashylyǵyna jáne jylqylarǵa, sondaı-aq bıdaıǵa, kebek pen soıaǵa ashyq. Iranǵa tiri, muzdatylǵan jáne salqyndatylǵan qoı etin jetkizýde kedergiler joıyldy. Nátıjesinde 2017 jyly Iranǵa alǵash ret 4 763 bas tiri qoı jóneltildi. Saýd Arabıasy men Birikken Arab Ámirlikterine iri qara men usaq maldy jetkizýde kedergiler joıyldy. Sonymen qatar Birikken Arab Ámirlikterine et pen et ónimderin, taýyq jumyrtqalary men úı qustaryn jetkizýde bóget bolmaıdy», - dep atap ótti vıse-mınıstr.