2018 jyldyń 1 mamyrynda Qazaqstan Respýblıkasy Ulttyq ǵylym akademıasynyń akademıgi, fılologıa ǵylymdarynyń doktory Shora Shamǵalıuly Sarybaev 93 jasynda ómirden ótti.
Bul týraly ǵalymnyń týystary men áriptesteri áleýmettik jelide habarlady.
«Qazaq tili taǵy bir arysynan aıyryldy, aǵaıyn! Barlyq ǵumyryn qazaq tilin zertteýge baǵyshtaǵan Akademık Shora Shamǵalıuly Sarybaev aqsaqal búgin 93 jasynda ómirden ozdy. Orny tolmas aýyr qaza! Maıra, Saltanat, Qaırat, qaıǵylaryńa ortaqpyz. Aǵataıymnyń jany jánnatta bolsyn, urpaqtary aman bolsyn!», - dep jazdy fılosofıa ǵylymdarynyń kandıdaty Murtaza Júnisuly Facebook-tegi paraqshasynda.
Shora Shamǵalıuly Sarybaev 1925 jyly 2 naýryzda Tashkent qalasynda dúnıege kelgen. Til bilimi mamany, fılologıa ǵylymı doktory (1974 j.), profesor. (1979 j.), QR UǴA korespondent múshesi, (1983 j.), Qazaqstannyń eńbek sińirgen ǵylym qaıratkeri (1985). Onyń ǵylymı zertteý eńbekteri dıalektologıa, morfologıa, leksıkologıa, leksıkografıa, bıblıografıa, til tarıhy, aýdarma, esimnama, altaıstıka máselelerine arnalǵan. 250-den astam ǵylymı maqalalary men oqýlyqtary, monografıalary jaryq kórgen. S.Amanjolovtyń tildegi dıalektilerdi toptaý teorıasyn ári qaraı damytyp, dıalektologıa salasyndaǵy termınderdiń qalyptasýyna atsalysqan. "Qazaq tiliniń qysqasha etımologıalyq sózdigin" (1966), "Qazaq tiliniń dıalektologıalyq sózdigin" (1969), "Jańa ataýlar sózdigin" (1992) qurastyrýǵa qatysqan.
1965 jyly AQSH-taǵy Garvard korporasıasynyń músheligine saılanǵan, GFR-da (1975), Túrkıada (1994) ótken halyqaralyq kongres, konferensıalarda baıandamalar jasaǵan.
Marqummen qoshtasý rásimi 3 mamyrda saǵat 10.00-de Almatydaǵy Ǵylym Akademıasy ǵımaratynda (Qurmanǵazy kóshesi, 29-úı) ótedi.
