Ońtústik Qazaqstan oblysy, Shardara qalasyndaǵy Sport kesheninde «Qazaqstan barysy» respýblıkalyq týrnırine oblystyq irikteý ótti. Saıysqa oblystaǵy qala men aýdandardan barlyǵy 26 palýan qatysty.

Jerebe boıynsha palýandardyń qarsylastary anyqtalǵan soń beldesýler bastaldy.  Zalǵa tolǵan jankúıerler, arnaıy qonaq bop kelgen aqsaqaldar qaýymy palýandardyń kúresin tushyna tamashalap, sportshylarǵa dem berip otyrysty. Boz kilem ústindegi alǵashqy beldesý Báıdibek aýdanynyń sportshysy Samat Esen men Shymkent qalasynyń atynan synǵa túsken Ádiljan Ystybaevtardyń arasynda ótti. 5 mınýtqa sozylǵan saıysta Ystybaev upaı sanymen jeńiske jetti.

Kilemge ekinshi bop shyqqan sozaqtyq Erasyl Sartaev pen saıramdyq Bekzat Qasymovtyń beldesýleri uzaqqa sozylǵan joq. 1 mınýt 36 sekýndta qarsylasyn atyp urǵan Bekzat Qasymovtyń qolyn tóreshi joǵary kóterdi. 

Tartysty ótken beldesýde baby men baǵy qatar kelisken myqtylar jeńiske jetip otyrdy. Alǵashqy saıysyn aıqyn basymdyqpen jeńip shyqqan shardaralyq palýan, sambo kúresinen álem chempıony Qaısar Shámshıddınov júldeli úshinshi oryndy baǵyndyrdy.

Aqtyq synda ordabasylyq Beıbarys Ábdiǵanı men taǵy bir shardaralyq dańqty palýan Ersultan Muzapparov kezdesti. Qazaq kúresinen eki dúrkin «Eýrazıa barysy» ataǵyn, byltyrǵy jyly álem chempıony ataǵyn jeńip alǵan Ersultan shıraq qımylymen, sheber ádisimen qarsylasyn qapy qaldyryp, taza jeńiske jetti.

Osylaısha Ersultan Muzapparov - «Ońtústik barysy» ataǵyn qanjyǵaǵa baılap, jankúıerlerin kezekti ret qýantyp tastady.  Týrnır sońynda aýdan ákiminiń orynbasary Baýyrjan Shompıev Ersultan Muzapparovqa 300 myń teńge syıaqy men jeńis belbeýin, «Ońtústik barysy» kýbogyn saltanatty jaǵdaıda tapsyrdy.

Ekinshi oryn ıelengen Beıbarys Ábdiǵanıǵa 200 myń, úshinshi oryn ıelengen Qaısar Shámshıddınovke 100 myń teńge syıaqy berildi. Oıyn barysynda úzdik óner kórsetken basqa da birqatar sportshylarǵa arnaıy syılyqtar berildi.