BQO-da medısına salasy boıynsha sıfrlandyrý jumystary  qarqyndy júzege asyp keledi. Osy oraıda aıta ketsek, Batys Qazaqstan oblystyq klınıkalyq aýrýhanacynyń qabyldaý bólimshesi trıaj júıesi boıynsha jumystanýda. Sondaı-aq stasıonarda jatatyn naýqas­tardyń elektrondy tirkelimi, emdeýge jatqyzý portaly jáne em­hanaǵa bekitiletin halyqtyń tir­kelimin jáne basqalardy ázir­leý jumystary jolǵa qoıylǵan. 

Trıaj júıesi boıynsha  aýrýhana ǵımaratyna kireberisten-aq edenge jasyl, qyzyl, sary jolaqtar júrgizilgen. Meıirbıkeler bólimshege kelgen naýqastardy qabyldap, jalpy jaǵdaıyn baǵalaıdy. Trıaj boıynsha kelýshiler úsh aǵyn túrine bólinedi. Qyzyl aǵynǵa aýyr dárejedegi naýqastar jatady. Olarǵa shuǵyl kómek kórsetiledi jáne qajet bolsa ota jasaýǵa, jan saqtaý bólmesine qyzyl jolaqpen áketedi. Sary aǵynǵa orta dárejedegi aýrýlar, olar shuǵyl kómekke muqtaj emes, biraq tekseriledi, tıisti kómek kórsetiledi. Jasyl aǵynǵa jatatyn aýrýlarǵa tekseriledi, kómek kórsetiledi, sodan keıin úılerine jiberiledi. Bólimshege kúnine 160-170 adam keledi, jaraqat alyp kelýshiler sany 60-70 shamasynda. Munda kúndiz túrli 12 dáriger maman dárigerlik kómek kórsetedi. Trıaj boıynsha naýqasqa shuǵyl túrde birneshe dáriger qyzmet kórsete alady.

Qabyldaý bólimshesi kelgen naýqastardy aýrýhananyń bólimshelerine rásimdeıdi. Bul jerde  mańyzdy emdeý-dıagnostıka jasalady, táýliktiń 24 saǵatynda jáne mereke, demalys kúnderi de kelýshilerge jedel dárigerlik kómek kórsetiledi. Aýrýhana dırektory Arman Baıdeýovtyń aıtynsha, kelgen adamnyń jeke kýáligi arqyly bazadaǵy málimetterden onyń buryn qaıda qaralǵany, qandaı em alǵany, ota jasalǵany kórinip turady. Buryn osynyń bári qaǵazǵa túsiriletin.

– Elbasynyń tapsyrmasyna sáıkes oblystaǵy 23 memlekettik mednysan qaǵazsyz jumys isteýge kóshti. Sıfrlandyrý arqyly turǵyndarǵa kórsetiletin medısınalyq kómek sapasy jaqsarady, dárigerlerdiń esep jazýdan qoly bosap, naýqasqa kóbirek kóńil bóledi. Aqparattyq júıege kirigý úrdisi jalǵasady, birinshi jartyjyldyqtyń sońyna qaraı mednysandardy tolyqtaı sıfrlandyrýdy aıaqtaımyz. BQO-nyń medısına salasy – sıfrlandyrý jobasy boıynsha respýblıkada kóshbasshy. Mobıldik qosymshany iske qosý jumystary aıaqtalady. Bul qosymsha arqyly turǵyndar dárigerge onlaın jazyla alady, qajetti jaǵdaıda úıge dá-

riger shaqyrtady, – dedi oblystyq densaýlyq saqtaý basqarmasynyń basshysy Qanat Tósekbaev.