« ... Advokattardyń quqyqtary men sotqa deıingi satydaǵy sot baqylaýynyń aıasy keńeıdi. Quqyq qorǵaý organdarynyń ókilettigi men jaýapkershilik shegi aıqyndaldy.  Sondyqtan azamattardyń konstıtýsıalyq quqyqtaryna kepildikti nyǵaıtý, quqyq ústemdigin qamtamasyz etý, quqyq qorǵaý qyzmetin izgilendirý jumystaryn jalǵastyrý qajet» degen edi QR Prezıdenti Nursultan Nazarbaev «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýynda.  

Jýyrda Oral qalasyndaǵy  Dostyq úıinde BQO QHA-nyń uıymdastyrýymen «Batys Qazaqstan oblysynda medıasıany damytýdyń tıimdi ádisteri» atty forým ótti. Basqosýǵa Batys Qazaqstan oblysynyń  ákimi Altaı Kólginov jáne kásibı,  qoǵamdyq medıatorlar, quqyq qorǵaý qurylymdarynyń qyzmetkerleri, aýdan ákimderiniń orynbasarlary qatysty.

– Biz kóp ultty elmiz, kóp ultty el qashanda ymyra men bitimge dilger. Al medıator qashanda adamdardy ymyraǵa, túsinisýge shaqyrady. Iaǵnı daý-janjaldy órshitpeıdi. Buryn ol qazaqta tek bılerdiń tól isi bolǵan. Nátıjesinde burynǵy qazaq qoǵamynda daý-janjaldan týyndaǵan kıkiljiń tereńdemegen. Sóıtip, adamdar bir-birimen barynsha tatýlyqta ómir súrýge múddelilik tanytqan. Bizde medıasıa júıesiniń qoldanysqa engenine tap kóp ýaqyt óte qoıǵan joq. Soǵan qaramastan, qazir óńirde júzden astam medıasıa kabıneti bar. Demek, jumys baıaý bolsa da, ilgerilep keledi. Áli de qıyndyqtar jetkilikti. Olaı bolsa, forýmda tek jetistikpen shektelip qalmaı, qıynshylyqtar týraly da batyl aıtý qajet, – dedi jıyndy ashqan Altaı Seıdiruly.

Batys Qazaqstan oblystyq sotynyń tóraǵasy Bek Ámetov 2011 jyly qabyldanǵan «Medıasıa týraly» zańdy júzege asyrýda belgili bir jumystar tyndyrylǵanymen, áli daý-janjaldy sot úderimine jetkizbeı sheshýde paıdalanylmaı jatqan múmkindikter baryn aıtty. Onyń paıymdaýynsha, óńirdiń barlyq eldi mekeninde medıasıa kabınetteri jumys isteıdi. Biraq olardyń úgit-nasıhat jumysy mardymsyz. Sondyqtan oblystyq QHA negizinde medıatorlardy oqytý jumysyn uıymdastyrý qajet. Jumys sapasy da kún tártibinen túspeýi tıis. Eger medıatorlar jumysy jappaı óris alsa, sottarǵa túser salmaq azaıar edi. Jalpy, medıasıa jumysyn jeńildetý maqsatynda byltyr óńirde elimizde tuńǵysh ret «Sıfrly medıasıa» qanatqaqty jobasy engizilgen. Sondaı-aq medıatorlardyń basyn qosatyn ortalyq ne birlestik qurý da alǵash ret bizde qolǵa alynbaq. Jıynda Oraldaǵy kásibı medıator, «Tatýlas» kásibı medıatorlar mekemesiniń basshysy Maýlına Habıeva, №2 qalalyq sottyń sýdıasy Altyn Aıtýarova jáne basqalarynyń kún tártibindegi másele boıynsha habarlamalary tyńdaldy. Forým sońynda «Qoǵamdyq medıatorlar odaǵy» qurylyp, onyń tóraıymy bolyp  bórlilik Maıra Selbaeva saılandy. Al Alýa Rıhısheva «BQO medıatorlar odaǵy» qaýymdastyǵynyń tóraıymy boldy.