Ońtústik Qazaqstan oblysynda orman, dala órtterin sóndirýge qatysty taktıkalyq oqý-jattyǵý jıyny ótkizildi.

Ońtústik Qazaqstan oblysynyń tabıǵı resýrstar jáne tabıǵat paıdalanýdy retteý basqarmasynyń uıymdastyrǵan sharaǵa óńirlik tótenshe jaǵdaı qyzmeti men qorshaǵan ortany qorǵaý mekemesiniń ókilderi qatysty.

Aldyn ala ázirlengen baǵdarlama boıynsha Ordabasy aýdanynda tutanǵan órtti sóndirýge arnalǵan jedel áreket jasaldy. Atap aıtqanda, tótenshe jaǵdaı qyzmetiniń jeke quramy arnaıy kólikterimen sharpyǵan jalyn ortasyna jetip, ony aýyzdyqtaýǵa kiristi. Nátıjesinde órt der kezinde sóndirilip, orman alqaby tilsiz jaýdan aman qaldy.

Oqý jattyǵý jıynyna qorshaǵan ortany qorǵaý mekemelerinen 110 adam jumyldyryldy. Sondaı-aq, sharada 6 órt sóndirý kóligi, 12 traktor jáne basqa da tehnıkalar paıdalanyldy.

Oblystyq tabıǵı resýrstar jáne tabıǵat paıdalanýdy retteý basqarmasyna qarasty 7 orman sharýashylyǵy memlekettik mekemelerine 3 131,9 myń ga memlekettik orman qory bar. Osy aýmaqty qorǵaýǵa dep 2018 jylǵa 31 712,0 myń teńge qarjy bólingen. Bul qarjy 500 shaqyrym jańadan mıneraldy jolaq salý, 7 588 shaqyrym mıneraldy jolaqtardy kútip-baptaý, 210 shaqyrym órtke qarsy joldy jóndeý jáne 279 anshlag pen pannony jańartý jáne ornatý josparlanyp, tıisti jumystar atqarýǵa jumsalýda.