Ońtústik Qazaqstan oblysy Tóle bı aýdanynda sý shaıyp ketken eski qorymdaǵy múrdeler basqa jerge kóshirildi. Bul týraly Zertas aýylynyń ákimi Lesbek Serikbaev habarlady.

Aýyl ákiminiń sózinshe, múrdelerdi kóshirý jumystary aıaqtalýǵa jaqyn.

«Múrdelerdi kóshirý jumystarynyń barlyǵy sharıǵat jolymen jasaldy. Eski qorymda 20 adamnyń súıegi jerlengen. Bulaqtar sýyn ýaqytsha toqtatý jumystary sý sorǵysh qondyrǵylardyń kómegimen júrgizildi»,-deıdi Zertas aýylynyń ákimi.

Qorymdaǵy múrdelerdi kóshirý jumystary aýa raıynyń jaýyn-shashyndy bolýyna balanysty ýaqytsha toqtatylǵan bolatyn.

«Kóshirý kezinde eki ekskavator qoldanyldy. Biz sý shyqqan jerlerdi qazyp, qubyrlar tastadyq. Sý sol qubyrlarmen kanalǵa aqty. Bul jumystar áli de jalǵasýda. Degenmen 80 paıyzdyq júmys aıaqtaldy deýge bolady. Endi ol jerlerge tas tastap, ol aýmaqty kómý jumystary ǵana qalyp tur. Bári rettelgen soń, ol jerlerge aǵash otyrǵyzatyn bolamyz»,-deıdi Lesbek Serikbaev.

Aıta keteıik, buǵan deıin Zertas aýylyndaǵy eski qorymdy sý shaıyp, marqumdardyń súıegi jer betine shyǵyp qalǵany týraly habarlaǵan bolatynbyz. Ol kezde aýyl ákimi qorymnyń astynan bes birdeı bulaq kózi shyqqanyn aıtqan edi. Ondaǵy sýlar qorymnyń janyn jarqabaqqa aınaldyryp, sonyń saldarynan birneshe marqumnyń súıekteri sýǵa aǵyp ketkeni belgili bolǵan.