Ońtústik Qazaqstan oblysyna kelgen qonaqtar endi aımaqtaǵy tarıhı-mádenı eskertkishter men tabıǵı landshaftary jaıly aqparatty ǵalamtordan esh qıyndyqsyz taba alady. Sebebi, oblysqa saıahattap kelgen týrıserdi aqparatpen qamtamasyz etý maqsatynda óńirdegi 22 nysanǵa QR-kod taqtaıshalary ornatyldy.
QR-kod taqtaıshalary ornatylǵan kıeli, tarıhı nysandardyń tizimine Aqbýra kesenesi, «Saıram-ógem» ulttyq tabıǵı parki, Otyrar jáne Saýran qalashyqtary, «Qarataý» memlekettik tabıǵı qoryǵy, Aq meshit áýlıe úńgiri, Aqsý-Jabaǵyly qoryǵy, Ismaıl ata kesenesi, «Keme qalǵan» monýmenti, Arystan bab jáne Baba túkti shashty Áziz, Báıdibek ata jáne Domalaq ana, Gaýhar ana men Ibragım ata, Qarabýra keseneleri, «Qyzyr Paıǵambar» munarasy, Qarashash ana men Qoja Ahmet Iassaýı, Úkash ata men Appaq Ishan, Ysqaq bab keseneleri engen.
"Ontustik Tourism Center" týrısik aqparattyq ortalyǵy kıeli jerler týraly aqparatty úsh tilde ázirlegen. Mamandardyń sózinshe, kodty sýretke túsirgende málimet smartfonnan oqylady. Al ony oqý úshin smartfonǵa ınternetten «Neo Reader» jáne «QR Reading» sıaqty baǵdarlamalardy kóshirip alsa jetkilikti. Ornatylǵan taqtaıshalar kelýshi týrıser men jergilikti turǵyndardyń kóńilinen shyǵýda. Olardyń pikirinshe, baǵdarlama kez kelgen týrıske ólke jaıly basqa da qyzyqty maǵlumattardy izdeýge múmkindik beredi.Sonymen qatar, taqtaıshalarda kórsetilgen ON Guide mobıldi qosymshasynan oblystyń týrısik nysandary týraly aqparat alýǵa bolady.
Máselen, Túrkistan qalasyndaǵy tarıhı jáne mádenı nysandardyń týrıserine arnalǵan shtrıh-kodtary qazirdiń ózinde kópshiliktiń joǵary baǵasyn alyp úlgerdi. Al, «Hazret Sultan» memlekettik tarıhı-mádenı murajaı-qoryǵynyń eskertkishterin 3D túrinde vırtýaldy saıahat arqyly kórýge bolady. Bul degenimiz, álemniń kez kelgen jerinen adam murajaı eksponattaryn kóredi jáne ınternette olar týraly tolyq aqparat ala alady. «Qoja Ahmet Iassaýı» murajaı-qoryǵynda jerlengen handar, sultandar, batyrlar men bılerdiń tizimi elektrondy túrde jasaldy. Búgingi kúni murajaıdyń kestesi men oqıǵalar týraly aqparat ǵımarattyń qasbetinde, «Led» ekranynda ornalastyrylǵan.
Aldaǵy ýaqytta «OQO kıeli oryndary (eskertkishteri) geoaqparattyq júıede» jáne «Ońtústik Qazaqstannyń kıeli jerleri geografıasy» atty 700-ge jýyq kıeli nysandarǵa, sondaı-aq aýdan, qalalarda ornalasqan 100 monýmentti óner týyndysyna QR-kod baǵdarlamasy engiziletin bolady.
Al, Qazaqstannyń kıeli jerleri kartasyna engen 24 nysandy jáne oblystaǵy mýzeılerdiń qoryn sıfrlandyryp, «Ontustik TourAudio» mobıldi qosymshasyn ázirleýde. Mobıldi qosymsha dybystyq aqparatpen qosa, mátinmen sınhrondalǵan grafıkalyq beınelermen qatar júrýge múmkindik beredi.
Aıta keteıik, oblystaǵy 104 kıeli jerlerdiń tizimi «Qasıetti Qazaqstan» ǵylymı-zertteý ortalyǵyna usynylyp, 24 nysan Ońtústik Qazaqstan oblysynan respýblıkalyq tizimge engizildi. Qalǵan 80 tarıhı-mádenı eskertkishter jergilikti mańyzy bar qasıetti, kıeli jerlerdiń qatarynan tabyldy. Jalpy, kıeli oryndardy damytý maqsatynda 2017 jyly jergilikti búdjetten 314,6 mln teńge qarjy qaralyp, tolyǵymen ıgerildi.
