Shymkentte mekteppen qoshtasý keshterin ótkizýge tyıym salyndy. 25 mamyrda ótetin mektep bitirýshilerdiń «Sońǵy qońyraý» kúnine oraı quqyq qorǵaý organdarynyń qyzmetkerleri erekshe tártippen jumys isteıtin bolady. Bul týraly qalalyq ákimdiktiń uıymdastyrýmen ótken májiliste aıtyldy.

Oqý jylyn aıaqtaýǵa qatysty basqosýǵa prokýratýra, jergilikti polısıa qyzmetkerleri jáne qaladaǵy mektep basshylary túgel qatysty. Jıynda aldymen oqýshylardyń sońǵy qońyraýǵa daıyndyǵy pysyqtalyp, olardyń qaýipsizdigin qamtamasyz etý máselesi talqylandy. Jylda sońǵy qońyraýdan keıin túlekter qymbat kólikter jaldap, meıramhanalar men qala syrtyndaǵy saıajaılarda atap ótýi dástúrge aınaldyrǵany belgili. Munyń sońy qaıǵyly oqıǵalarǵa ulasyp jatatynyn eskergen jaýapty mamandar bıyl kemshilikterdi boldyrmaý maqsatynda barlyq múmkindikterdi qolǵa almaqshy.

«Mektep basshylaryna oqýshylardyń avtokólik sherýlerin uıymdastyryp, mektepten tys oryndarda kesh jasaýyna jol bermeý maqsatynda úgit-nasıhat jumystaryn kúsheıtýdi tapsyramyn. Ata-analarmen tyǵyz jumys istep, túsindirý sharalaryn júrgizý qajet. Óıtkeni, balalardyń qaýipsizdigi barshamyz úshin mańyzdy», - dedi Shymkent qalalyq bilim bólimi basshysynyń mindetin atqarýshy Aıgúl Tekebaeva.

Sonymen qatar mektep dırektorlaryna 1, 4, 9 jáne11 synyp oqýshylarynyń basshylyqqa, synyp jetekshisine baǵaly syılyq jasaýyna tyıym salý júkteldi. Bilim bóliminiń basshylyǵy mekemeniń aǵymdaǵy jóndeý jumystaryna ata-analardan aqsha jınaýyna jol berilmeıtini eskertildi. Jınalysqa qatysqan Eńbekshi aýdanynyń prokýrory bul kúni qaladaǵy jaǵdaı qadaǵalaýshy organ tarapynan qatań baqylaýǵa alynatynyn aıtsa, Shymkent qalalyq jergilikti polısıa qyzmetiniń ókili arnaıy mobıldik top qurylatynyn jetkizdi. Ásirese, Tashkent tasjoly, Báıdibek bı dańǵyly jáne dendrosaıabaq aýmaǵy baqylaýǵa alynatyn boldy.

Aıta keteıik, barlyq bilim uıalarynda «Sońǵy qońyraý» saltanatty is-sharasy Astananyń 20 jyldyǵyna arnalǵan «El júregi - Astana» taqyrybymen ótetin bolady.