Shymkentte otbasymen demalatyn alǵashqy «Arbat» el ıgiligine berildi. Beket batyr kóshesinen oryn tepken jańa demalys aımaǵynyń ashylý rásimine Ońtústik Qazaqstan oblysynyń ákimi Janseıit Túımebaev pen oblystyq jáne qalalyq máslıhattyń depýtattary.

Shymkent elimizdegi iri qalalardyń biri ekenin aıtqan aımaq basshysy damyǵan qalalardyń barlyǵynda halyq demalatyn oryndardyń kóptep ornalasýy zańdylyq ekenin atap ótti. Sonymen qatar qalany kórkeıtýdiń negizgi jumystaryna toqtalyp, atqarylyp otyrǵan jumystardyń barlyǵy qala jurtshylyǵynyń ıgiligi úshin jasalyp jatqanyn jetkizdi.

«Búgin Halyqaralyq otbasy kúni. Osyndaı kúni otbasylyq demalys orny - Shymkenttiń alǵashqy Arbatyn halyqtyń ıgiligine berip otyrmyz. 1 shaqyrymǵa deıin sozylǵan Arbat qurylysyn eki aıdyń ishinde aıaqtaǵan qala ákimdiginiń jaýapty basshylaryna alǵysymdy bildiremin. Endi bul jer qalamyzdyń eń tartymdy demalys orny bolady dep oılaımyn. Mundaı demalys orny aldaǵy ýaqytta qaladaǵy Asanbaı Asqarov pen Beıbitshilik kóshesinde de ashylady», - dedi Janseıit Túımebaev.

Aıta keteıik, arbatta  jańa shamdar ilinip, oryndyqtar qoıylǵan. Landshaft dızaıny kóz tartady. Qalanyń jasyl jelegine jańa reń qosqan arbat ádemi gúldermen kómkerilip, jaryq shashatyn shamdarmen bezendirilgen. Yńǵaıly demalys aımaǵynda sonymen birge velosıped jolaǵy da qarastyrylǵan. Mundaǵy 3600 sharshy metr aýmaq kógaldandyrylyp, 2000 sharshy metr jerdi aıaq joldar alyp jatyr. Budan bólek, ol jerge 700-ge jýyq jóke, talshyn, aqqaıyń syndy aǵash túrleri men 1000 túp raýshan gúli egildi. Túngi arbatty jaryq etýge 76 kóshe shamdary men 45 kishi torsherler qoıyldy.

Qazirgi tańda mamandar arbattyń erekshe kelbetin asha túsetin arkany qurý jumysyn aıaqtaýda.  Jýyq arada Beket batyr kóshesiniń bul bóligi naǵyz shyǵarmashylyq adamdarynyń ortalyǵyna aınalmaq. Sebebi bul aýmaqqa Sýretshiler úıin salý josparlanyp otyr.

Bul kúni aımaq basshysy Janseıit Túımebaev  sondaı-aq  oblystyq jáne qalalyq máslıhattyń depýtattaryna «Eski qalany jańǵyrtý» jobasy aıasynda atqarylyp jatqan jumystardy tanystyrdy. Onda ákim «Qoshqar-ata» ózeni jaǵalaýynyń eninen 10 metr, uzyndyǵy 1200 metr jer halyqtyń demalys ornyna aınalatynyn atap ótti. Búginde atalǵan joba aıasynda Ordabasy alańynan Ózbek kóshesine deıingi ózen boıymen júrip ótetin 300 metrden astam aıaq jol kógaldandyrylyp, abattandyrý jumystary júrgizildi. Sonymen qatar halyq qalaýlylaryna Qoshqar ata ózeniniń jaǵalaýynda boı kóteretin «Qoshqar ata» turǵyn úı kesheniniń maketi kórsetildi. Jańadan salynatyn keshenniń qurylysy úsh kezeń boıynsha júrgiziledi. Joba tolyǵymen júzege asqanda  208 myń sharshy metrdi quraıtyn, 3976 páterli 61 kópqabatty turǵyn úı el ıgiligine tapsyrylady dep kútilýde.