Sozaq aýdanynyń ortalyǵyndaǵy Táýelsizdik saıabaǵynda úsh aıdan beri ótip jatqan "Teriskeı talanttary-2018" halyq óner festıvaliniń "Halyq-óner qaınary" atty ujymdyq kórkemónerpazdar baıqaýy Syzǵan, Jýantóbe aýyldyq okrýgteri ónerpazdarynyń konsertimen jalǵasty.
Elbasy Nursultan Ábishuly Nazarbaevtyń "Bolashaqqa baǵdar: rýhanı jańǵyrý" baǵdarlamalyq maqalasy aıasynda týǵan jerdiń rýhanı, mádenı qundylyqtaryn keńinen nasıhattaý jáne Astananyń 20 jyldyǵy men Sozaq aýdanynyń 90 jyldyǵyna arnap uıymdastyrylǵan festıvál barysynda aýdandaǵy árbir aýyldyq okrýgte ónerdiń barlyq janry boıynsha is-sharalar ótip, qorytyndy gala-konsertti ortalyqta ótkizý mindettelgen bolatyn.
Osy oraıda, atalǵan qos aýyldyq okrýg kezegimen óz baǵdarlamalaryn usyndy.
Aıta keterligi, Jýantóbe aýyly mádenı is-sharany tuńǵysh ret keń kólemde ótkizip, elge erekshe áser qaldyrǵan. 2000-nan asa halqy bar eldimekennen 100-den asa ónerpaz jumyldyrylyp, "Úshkókshe áýeni-Jýantóbe" atty merekelik sharada Teriskeı tósindegi tasada júrgen talanttar kıeli sahna tórine shyǵyp ásem án aıtyp, myń burala bı de bıledi. Ásirese, "Rýhanı jańǵyrý", Astanaǵy - 20jyl", "Sozaqqa - 90 jyl" fleshmoby men jergilikti aqyn-sazgerlerdiń ánderi, mektep ustazdarynyń ıntermedıasy, óńirdiń sulý sóz zergerleri Jupar Júzbaeva men qyzy Jáýdir Jubanyshevanyń "Jýantóbe" shyǵarmalary qart Qarataý qoınaýynda mamyrajaı kún keship jatqan meıirban da eńbekqor, tatýlyǵy men aýyzbirligi bekem halyqtyń qasıetin, jerdiń ereksheligin, tabıǵı qalpyn kórermen kóńiline óner arqyly qondyra bildi.
"Jýantóbe aýylynan shyqqan qanshama ánshi, aqyn, sazgerler jeterlik. Búgingi baıqaýda barynsha taqyrypty ashýǵa tyrystyq. Aýyldyq okrýgtiń tarıhy men tynys-tirshiligin, qolóner jáne qylqalam sheberleriniń eńbegin kórsetetin kórme uıymdastyrýmen qatar, eńkeıgen qarttan júgirgen balaǵa deıin aýdan ortalyǵynan 150 shaqyrym jerden 30-ǵa jýyq kólikpen keldik. Qarıalarymyz aýyldan ósip kele jatqan jas daryndardy búgin kórip, qýanyp, aq batalaryn berip jatqanyn da kórdińizder. Úlken sahnaǵa shyǵyp, dúıim halyq aldynda tusaýy kesilip jatqan jas talanttarymyzdyń baǵy jana beretinine senimim mol"-deıdi, Jýantóbe aýyldyq okrýginiń ákimi Abraev Dáýirjan Joldasuly.
Kerýendete jetken merekelik keshke respýblıkaǵa tanymal ánshi, Jýantóbe aýylynyń týmasy Marat Imashov ta qatysyp, elge óner sálemin joldady.
Festıvál jeńimpazdary 1 maýsym kúni "Teriskeı talanttary-2018" baıqaýynyń qorytyndy gala-konsertinde aýdan ákiminiń qomaqty syılyǵymen marapattalatyn bolady .
