«Jýrnalıs bolǵym keledi» taqyrybyna jazylǵan úzdik shyǵarmanyń ıesi anyqtaldy. Buǵan deıin Súleıman Demırel ýnıversıtetiniń bilim grantyn jeńip alý úshin bolashaq talapkerlerge konkýrs jarıalanǵan edi. Baıqaýdyń ekinshi kezeńinde úmitkerler komısıa múshelerimen kezdesip, erkin suhbat ótkizdi. Súleıman Demırel ýnıversıtetiniń bilim grantyna kim ıe boldy?
Baıqaý fınalısteriniń júzderinen qobaljý baıqalmaıdy. Tek sál shydamdylyq tanytyp, ýnıversıtet qabyrǵasynda kimniń tegin bilim alatynyn bilý ǵana qaldy. Mektep bitirýshi túlekterden 348 esse kelip túskende, uıymdastyrýshylardyń ózderi tańdaı qaqqan. Qatysýshylar elimizdiń túkpir-túkpirinen kelgen. Ádilqazylar alqasy aldymen shyǵarmalardyń arasynan 23-in iriktepti.
«Túlekter tarapynan osynsha adam qatysady dep oılaǵan emespiz. Júz shaqty adam qatysady dep paıymdaǵan edik. Degenmen «Almaty» telearnasynyń deńgeıi men atqarǵan jarnamalaý jumystary bul mamandyqqa degen suranystyń bar ekendigin dáleldedi», - dedi Súleıman Demırel ýnıversıtetiniń rektory Qanat Qojahmet.
Qatarlastarynan oq boıy oza shapqan astanalyq oqýshy Lesqalı Arýjan ýnıversıtettiń bilim grantyna ıe boldy. Komısıa músheleriniń kóńilinen shyqqan ol esseni bolashaq qyzynyń atynan jazyp, erek dep tanylǵan.
«Úsh apta boıy oılanyp, tolǵanyp, júregimdeginiń barlyǵyn shyǵaryp, erekshe jetkizip, essemdi jiberdim. Taqyryby: Jýrnalıs bolǵym keledi. Kez kelgen suraqqa mardymdy jáne naqty jaýap bere alý, ol - jýrnalıstiń basty qasıeti», - dedi baıqaý jeńimpazy Arýjan Lesqalı.
Baıqaý fınalısterine sertıfıkattar tabystalsa, ekinshi jáne úshinshi oryn ıelegenderge baǵaly syılyqtar berildi. Ýnıversıtettiń bilim grantyn jeńip alǵan bolashaq maman «Almaty» telearnasynda tájirıbesin jetildirip, kásibı biliktiligin shyńdaı alady. Aıta keteıik, bul Súleıman Demırel ýnıversıteti men «Almaty» arnasynyń alǵashqy birlesken jobasy emes. Qyrkúıek aıynan bastap, telearna bazasynda jýrnalısıka akademıasy óz jumysyn bastaıdy. Onda bolashaq mamandar tilshilik ómirdiń tirshiligin jan-jaqty úırenetin bolady.
«Súleıman Demırel ýnıversıtetimen birige biz eki jobany qolǵa aldyq. Onyń biri osy baıqaý bolsa, ekinshisi ýnıversıtettiń dýaldy bilim júıesin paıdalanýǵa baǵyttalǵan. Bul Qazaqstandaǵy júzege asyrylǵaly otyrǵan birinshi jumys. Iaǵnı, belim berý prosesiniń bir bóligi ýnıversıtet qabyrǵasynda, jartysy "Almaty" telearnasynyń bazasynda júzege asady. Qyrkúıek aıynan bastap Jýrnalısıka akademıasy óz jumysyn bastaıdy», - dedi «Almaty» telearnasynyń Bas dırektory Álibek Áldeneı.
Uıymdastyrýshylar «Jýrnalıs bolǵym keledi» baıqaýyn dástúrge aınaldyrmaq nıette. Oǵan baıqaýǵa úmitkerlerdiń kóp bolýy sebep bolǵan. Aıta keteıik, bıylǵy shara qazaq televızıasynyń 60 jyldyǵymen tuspa-tus kelip otyr.
