Almatyda satylymdaǵy 22 myńnan astam tonda tańbalaý belgileri joq. Búgingi kúni 139 kásipker teri buıymdaryn baqylaý kodyn alýǵa ótinish joldapty. Bul pılottyq joba ótken jyly qolǵa alynǵan. Al endi elge jetkiziletin barlyq ań terisinen tigilgen syrt kıim mindetti túrde tańbalanatyn bolady.

Saýda oryndaryndaǵy tondar men teri ónimderinen tigilgen kıimderdiń túrinen kóz súrinedi. Baǵaly kıimniń qaı ańnyń terisinen tigilgenin ajyratý qıyn. Saýdagerler qoıan terisin qundyzdiki,-dep satyp, tutynýshylardyń birazyn aldaǵan.  Budan bylaı baǵaly kıimder tańbalanatyndyqtan, ondaı áreketke jol berilmeıdi.

«Qymbat baǵaǵa ton satyp alyp, qundyz terisi,- dep sengeni, keıinnen qoıan terisinen tigilgeni anyqtalǵanyn jıi estıtinmin. Sodan keıin jalǵanǵa urynamyn ba degen kúdik bolatyn. Al endi olardyń barlyǵy qazir tańbalanyp jatyr. Sol arqyly tonnyń qandaı teriden tigilgenin, óndirgen memleketi men jetkizýshisi jóninde aqparatty tolyq ala alasyń»,-dedi Ásel Kenbaeva.

Teri buıymdaryn baqylaý belgisin ornatý byltyrdan beri qolǵa alyndy. Pılottyq joba kóleńkeli bıznesti joıyp, tutynýshylardy alaıaqtardan qorǵaýǵa múmkindik beredi. 

«Ań terisinen tigilgen barlyq syrt kıimder tańbalanýy tıis. Al eger kıimniń tek jaǵasyna, qaltasyna, ıaǵnı tek keıbir bólshekterine ǵana tigilgen bolsa, oǵan arnaıy belgi qoıýdyń qajeti joq»,-dedi Almaty qalasy Medeý aýdany memlekettik kirister basqarmasy basshysynyń orynbasary Ýálıhan Álibekov.

Qazirgi tańda Almaty qalasy boıynsha 22 myń tonda tańbalaý belgileri qoıylmaǵan. Bul shaharǵa buǵan deıin jetkizilgen taýardyń sany. Búgingi kúni 139 kásipker teri buıymdaryna baqylaý kodyn alýǵa ótinish beripti.