Almatydaǵy Kúlásh Baıseıitova atyndaǵy daryndy balalarǵa arnalǵan mektepke 70 jyl toldy. Osyǵan oraı, bilim oshaǵynyń oqýshylary mereıtoıǵa arnap konsert ótkizdi. Talaı sańlaqtar shyqqan óner ordasyn 2 myńnan astam bala bitirgen. Onyń myń jarymdaıy túrli halyqaralyq deńgeıdegi konkýrstardyń jeńimpazdary atanǵan.
70 jyldyq tarıhy bar bilim berý mekemesinen attary álemge áıgili kompozıtorlar, dańqy dúnıejúzine tanylǵan dırıjerler jáne memlekettik dárejedegi qyzmetkerler túlep ushqan. Qazaqtyń mańdaıyna bitken jaryq juldyzdardy tárbıelegen óner ordasynyń mereıtoıymen qos mınıstrlik quttyqtap, 10 ustazǵa «Bilim berý isiniń úzdigi» jáne «Mádenıet salasynyń úzdigi» tósbelgilelerin tabystady.
«Qazaqstan mýzyka mádenıetiniń damýy men órkendeýine qosqan sizderdiń úlesterińiz orasan zor. Shyǵarmashylyq jáne kásibı sheberligi óte joǵary deńgeıdegi áıgili pedagogıkalyq ujym jas daryndy mýzykanttardy daıarlaý jolynda úlken jetistikterge jetti»,-dedi QR Mádenıet jáne sport vıse-mınıstri Aqtoty RAIYMQULOVA.
Merekelik konsertte mekteptiń estrada-sımfonıalyq jáne qazaq halyq aspaptar orkestri, ansámblder men oqýshylar hory óner kórsetti. Osylaısha bas-aıaǵy 300-den astam bala túrli aspaptardyń qulaǵynda oınaıtyndyqtaryn kóp aldynda dáleldedi.
Mektep túlekteriniń arasynda esimi elge tanylyp qalǵan mýzykanttar da bar. Olardyń óner jolynda er jetýine Kúlásh Baıseıitova atyndaǵy mekteptiń zor yqpaly tıgen. Olar dál osy bilim berý mekemesin bitirgenderin maqtan tutady.
«Kishigirim mektep úlken ómirge degen kóptegen sabaqtaryn bilip berip jáne de meniń oıymsha osy Baıseıitov mektebinde men oqymasam men múmkin múlde sahnaǵa shyqpas edim. Degenmen birinshi mamandyq boıynsha klasıkalyq pıanıspin. Pıanıs bolmasam da, barlyq mýzykalyq bilim jáne mýzykalyq saýattylyq degende onyń bárin tek qana sol mektepte beredi dep oılaımyn»,-dedi ánshi Álı OQAPOV.
«Bul mektep meniń, qıyn aspap sanalatyn, skrıpkada kásibı deńgeıde oınaýyma óz úlesin qosty. Elimizdiń mýzyka salasyn damytý úshin aıanbaı eńbek etip júrgen qaıratkerler oqytqan, ómirlik sabaq bergen bilim ordasy ary qaraı órkendeı bersin!»,-dedi Qazaqstannyń eńbek sińirgen qaıratkeri Jámılá SERKEBAEVA.
1948 jyly ashylǵan úsh tilde bilim beretin mýzyka mektebi 480 oqýshyǵa shaqtalypty. Al elimizdiń ár óńirinen arman qýyp keletin jetkinshekterge oqý ordasy janynan 110 oryndyq ınternat qarastyrylǵan. Bilimi men mýzykaǵa erekshe qabileti bar daryndy balalarǵa 187 pedagog dáris beredi.
«Árbir daryndy bala biz úshin altyn shyǵatyn jer, munaı shyǵatyn jer memleketke qandaı baılyq bolsa, daryndy bala da sondaı deńgeıde bizdiń elimizdiń baılyǵy. Ujymymyzda bilikti mamandar qyzmet isteıdi myna daryndy balalarmen. Daryndy balalardy oqytý óte jaýapty. Ómirge daryndy bolyp kelgen balany oqytý, ony qalyptastyrý óte jaýapty jumys»,-dedi Kúlásh Baıseıitova atyndaǵy daryndy balalarǵa arnalǵan RMMOMI RMM dırektory Oqan ABDÝLLAEV.
Aıta keteıik, endi jýyq arada mektepke qarama-qarsy betten Birikken Ulttar Uıymynyń haby ashylady. Bul aty álemge áıgili mektep turǵan aýdandy kórkeıtýge sep bolmaq.
