Almatydaǵy eki myńnan asa turǵyn úıdiń turǵyndary esepteý quralynyń joqtyǵynan artyq tólem jasap keledi. Qazir qala boıynsha mundaı qurylǵy jeti myń úıge ornatylypty. Bul arqyly árbir tutynýshy qansha energıany paıdalanǵanyn bilip otyrady.
Ár páterge qansha jylý berildi, ystyq sýdyń kólemi qansha? Esepke alý qurylǵysy málimetti saǵat saıyn óńdep otyrady. Temperatýra men sýdyń deńgeıin ólsheıtin bul apparat arqyly ár turǵyn ketken shyǵyndy bile alady. Derekter qoryn páter ıeleri kooperatıvi tekserip otyrýlary tıis. Eger júıede aqaý tabylsa, belgi beriledi.
«Bul júıe paıdaly. Nelikten? Óıtkeni bir úıge qansha temperatýra jylý kelgenin bilýge kómektesedi. Tutynýshylar da sáıkesinshe, paıdalanǵan jylýǵa tóleıdi. Ystyq sýdyń baǵasy da jylýǵa tikeleı baılanysty. Mysaly, úıde qansha adam tirkelse, esepteý quraldary úıdegi ár adamǵa tekshe metrdi eseptep beredi», -dedi «Orbıta-1» PIK tóraıymy Galına Poteshkına.
Derekterdi eshkim ózgerte almaıdy. Qyzmetkerlerdiń ózderi málimetti tek kóshirip qana alýǵa múmkindigi bar. Qazir mundaı qurylǵylar qaladaǵy jeti myńnan asa úıge ornatylǵan. Al eki myńnan asa turǵyn jylý men ystyq sýǵa burynǵy júıe boıynsha tólem jasaıdy. Iaǵnı, jalpy soma turǵyndarǵa teńdeı bólinedi.
«Ár esepteý quraly qyzmet kórsetýdi talap etedi. Eger qaraýsyz qalsa, shyǵyndy esepteý, kórsetkishterdi belgileý qıynǵa soǵady. Kún saıyn qadaǵalap otyrý búginde GSM modemniń kómegimen júzege asady. Ol úshin Almaty jylý júıeleriniń saıtyna kirip, kórsetkishti qarap otyrýǵa múmkindik bar», - dedi «Almaty jylý júıeleri» JSHS bólim basshysy Dmıtrıı Fedúkov.
Budan bólek, endi shyǵyn kórsetkishterin, úıdi kútip-ustaýǵa qajetti qarajatty «Elektrondy PIK» qosymshasy arqyly bilip, kooperatıv jetekshilerimen úıden shyqpaı-aq baılanysýǵa bolady. Jobany júzege asyrý kelesi jylǵa josparlanǵan, al ázirge júıe naqtylanyp jatyr.
«Biz memlekettik-jekemenshik seriktestik aıasynda Páter ıeleri kooperatıvi arqyly elektrondyq qyzmet kórsetý júıesin enegizbekshimiz. Iaǵnı, ár turǵyn elektrondy túrde ótinish berip, elektrondy túrde daýys berip, tipti, PIK esebimen de tanysa alady. Bul turǵyn úılerge qyzmet kórsetýdiń ashyqtyǵyn qamtamasyz etedi», - dedi Almaty qalasy Turǵyn úı jáne turǵyn úı ınspeksıasy basqarmasynyń basshysy Ánýar Óskenbaev.
Aıta keteıik, bul qosymsha arqyly ár páter ıeleri kooperatıviniń qyzmeti jiti baqylanady. Ótken jyly tekserilgen 260 kooperatıvtiń 104-nen olqylyq tabylǵan.
