Qalanyń tirligi sharshatqan halyqty aldaǵy demalys kúnderine qyzyqty sharalar kútedi. Kıiz úı merekesi, sybyzǵy konserti josparlanǵan. Odan bólek, káris ultynyń mádenıetimen tanysý múmkindigi jasalmaq.
Almatynyń Arbaty naǵyz etnoaýylǵa aınalmaq. Qalada ekinshi ret «Kıiz úı merekesi» atap ótiledi. Erekshe shara eki kúnge jalǵasady. Ulttyq dástúr ádet-ǵurypty jańǵyrtýdy kózdegen shara erteń bastaý almaq. Onyń aıasynda almatylyqtar kıiz úı tigý barysymen tanysyp, ony ornatýdyń tártibi men erekshelikterin úırene alady.
Shara kórkin Ortalyq Azıadan jıylǵan sheberler, zergerler men tiginshiler asha túspek.Oǵan qosa, almatylyqtar kıiz basýdyń ádis-tásiline qanyǵa alady. Sondaı-aq arqan tartys, toǵyzqumalaq syndy qazaqtyń ulttyq oıyndary oınatylyp, kóńildi serpilte túspek.
Al Stýdentter saraıynda koreı mádenıetiniń festıvali ótpek. Ónerpazdar eki myń jyldyq tarıhy bar tańsamaly eliniń salt-dástúri men ónerin tanytady. Ulttyq aspaptar saltanat qurǵan konsertte dástúrli mýzyka áýelep, halyq ánderi tamyljyta shyrqalmaq. Myń buralǵan bıshiler kóne jáne zamanýı bı qımyldarymen kesh kórkin asha túspek. Tamyry tereńde jatqan salt-sanadan syr sherter teatrlandyrylǵan qoıylymdar usynylady.
Klasıkalyq ándi jany súıetinder úshin Jambyl atyndaǵy Qazaq memlekettik fılarmonıasynda sybyzǵy konsertiniń keshi uıymdastyrylmaq. Keshki saǵat altyda bastalatyn konsertte uly kompozıtorlardyń ataqty shyǵarmalary oryndalady. Ónersúıer qaýym nazaryna álemdik mýzyka tarıhynda súbeli úlesi mol árbir týyndynyń ózine tán áýen yrǵaǵy bar, oryndalýy da erekshe.
19 mamyrda «Alash» sport kesheninde túrli tuqym ıtteriniń kórmesi ótpek. Qala turǵyndary men qonaqtary qazaqtyń tazysynan bastap, Sibir haskıi, labrador, retrıver, nemis ovcharkasy jáne taǵy da basqa asyl tuqymdy ıtterdi kóre alady. Fýtbol jankúıerleri úshin de Ortalyq stadıonda erekshe oıyn ótedi. Almatylyq Qaırat pen Qaraǵandynyń «Shahter» komandalary saıysady. Demalys kúnine josparlanǵan mádenı sharalar toptamasy osy. Demalystaryńyz mándi, ári sátti ótsin.
