Qazcontent AQ "Astananyń 20 jyldyǵyna" oraı arnaıy jobany bastady, dep habarlaıdy Qamshy.kz aqparat agenttigi

Endi Sizder ár beısenbi saıyn Elordaǵa eńbegi sińgen túrli sala ókilderiniń ómirlerin tamashalaı alasyzdar. Bul týraly joba tızerin bólisken ókil Oljas Berkinbaev áleýmettik jelide habarlady. 

1998 jyldyń 6 mamyrynda Qazaqstan Prezıdenti Nursultan Nazarbaev «Qazaqstan Respýblıkasynyń astanasy - Aqmola qalasyn Qazaqstan Respýblıkasynyń astanasy - Astana qalasy dep qaıta ataý týraly» Jarlyqqa qol qoıdy. Iaǵnı, osydan 20 jyl buryn Astana tarıhyndaǵy asa mańyzdy qujat jaryqqa shyqqan bolatyn.

Qazaqstannyń jańa astanasynyń ataýyna qatysty másele ol kezde qoǵamda úlken pikirler týdyrǵan bolatyn. Jańa elordanyń ataýyna baılanysty túrli usynystar ártúrli deńgeıde talqyǵa túsken edi. Alaıda Elbasy Nursultan Nazarbaevtyń Astana týraly ıdeıasy sol kezdegi qalalyq máslıhat depýtattaryna usynylyp, bul biraýyzdan qoldaý tapty. Osynaý tarıhı kún jaıynda Prezıdenttiń ózi: «Bir joly túnde, dálirek aıtsam, saǵat túngi ekide Astana degen ataý oıyma sap etip, kókeıime qona ketkeni. Astana degenimiz astana! Qazaqsha ádemi estiledi. Qomaqty, aýyz tolady, qysqa da nusqa, áýezdi. Oryssha da, aǵylshynsha da solaı estiledi. Bul ataýda batyldyq, myǵymdyq jáne aıqyndyq reńk bar. Astana!» dep eske alady. Osydan soń Astana qalasynda «Saryarqa» jáne «Almaty» aýdandary quryldy.

Shyndyǵynda Astana - eshqandaı teris maǵynasy nemese basqa bir mánmátini joq, naqty ataý. Elbasy aıtqanyndaı Astana halyqaralyq tilde de solaı jaqsy, kemketiksiz estiledi. Eske salsaq, elordany Almatydan Aqmolaǵa aýystyrý týraly sheshimdi Qazaqstan Respýblıkasy Joǵarǵy Keńesi 1994 jyly 6 shildede qabyldady. Astanany resmı kóshirý 1997 jylǵy 10 jeltoqsanda júzege asty. Prezıdenttiń 1998 jylǵy 6 mamyrdaǵy Jarlyǵymen Aqmolanyń ataýy Astana bolyp ózgertildi. Jańa astananyń halyqaralyq tusaýkeseri 1998 jylǵy 10 maýsymda ótti. 1999 jyly Astana IýNESKO sheshimimen «álem qalasy» ataǵyn aldy. Qazaqstannyń bas qalasy 2000 jyldan bastap Astanalar men iri qalalardyń halyqaralyq assambleıasynyń múshesi atandy.

Bıyl Astanaǵa 20 jyl tolady.