Mereıtoıy ótken jyldyń 10 jeltoqsanynda bastalǵan  Astana qalasynyń 20 jyldyǵyn merekeleý aıasynda teńge ilý jáne aýdaryspaqtan Azıa chempıonattary ótedi. Bul týraly Mádenıet jáne sport mınıstrligi aqparat taratty. Aıta ketsek Astana mereıtoıyna Astananyń ózinde 630 is-shara ótedi dep josparlanǵan.

Astananyń 20 jyldyq mereıtoıy qarsańynda, "Rýhanı jańǵyrý" baǵdarlamasy aıasynda maýsym aıynyń 1-2 kúnderi Astanada Teńge ilýden İİ Azıa chempıonaty, Aýdaryspaqtan İİİ Azıa chempıonaty ótkizilmek. 

Búgin QR Mádenıet jáne sport mınıstri Arystanbek Muhamedıuly ulttyq sportty damytý boıynsha arnaıy májilis ótkizip, baıraqty básekeniń daıyndyǵyn pysyqtady. Májiliske QR Mádenıet jáne sport vıse-mınıstri Sáken Musaıbekov, QR Ulttyq sport qaýymdastyǵynyń prezıdenti Bekbolat Tileýhan, Sport jáne dene shynyqtyrý isteri komıtetiniń tóraǵasy Serik Jarasbaev jáne chempıonattardyń ótkizilýine jaýapty mekemelerdiń mamandary qatysty. 

Qos birdeı halyqaralyq ulttyq sport básekelerinde Azıanyń onǵa jýyq memleketiniń sportshylary baq synamaq. 

«Osyndaý mańyzdy data qarsańynda bizdiń vedomstvo mádenı sharalarmen birge, sporttyq saıystardy daıarlap jatyr. 31 mamyrdan 2 maýsym aralyǵynda sizderdi «Qazanat» ıpodromynda ulttyq sport túrleri boıynsha óte tartymdy sharalar kútip tur. Atap aıtqanda, teńge ilýden İİ Azıa jáne aýdaryspaqtan İİİ Azıa chempıonattary ótedi», - dep málimdedi mınıstr Arystanbek Muhamedıuly.

Atalǵan sporttyq sharalarǵa IýNESKO-nyń  Dástúrli sporttar men oıyndar komıteti  ókilderiniń qatysýy josparlanǵan.

«Teńge ilý jarysyna  7 elden sportshylar keledi, ıaǵnı olardyń arasynda Túrkıa, Reseı, Ózbekstan, Qyrǵyzstan, Tájikstan, Aýǵanstan men Mońǵolıa bar. Al aýdaryspaq saıysyna 9 memlekettik sportshylary elimizge saparlaıdy. Shetel tarapynan osyndaı chempıonattarǵa qyzyǵýshylyq joǵary», - A. Muhamedıuly.

Onyń atap ótýinshe, teńge ilýden İİ Azıa jáne aýdaryspaqtan İİİ Azıa chempıonattarynyń jalpy júlde qory - 14 000 000 teńge.

Esterińizge sala keteıik, aýdaryspaqtan I Azıa chempıonaty 2014 jyly Astanada, II Azıa chempıonaty 2016 jyly Qytaıda ótken bolatyn. Al  teńge ilýden I Azıa chempıonaty Astanada 2015 jyly uıymdastyryldy.

Mereıtoı aıasynda Maýsymnan qyrkúıekke deıin Etnoaýyl mádenı kesheni qaıta ashylady, onda «Alpamys», «Shkola trapesıı» atty teatr-sırk shoýy uıymdastyrylady. Mereıtoıǵa álemniń jetekshi shyǵarmashylyq ujymdary men uıymdarynyń qatysýymen «Astanalar sherýi» atty aýqymdy halyqaralyq joba, tanymal ártister men 20 eldiń belgili sportshylary qatysady. Joba aıasynda álemge áıgili rejıser Tımýr Bekmambetovtiń basshylyǵymen «Astana Opera» men Dj. Pýchchını «Týrandot» Pekın ulttyq operasynyń birlesken shyǵarmalary ótedi.

Iá, qazaq ultynyń uly tuǵyry, Alash jurtynyń asqaq aıbary – arý Astanaǵa 20 jyl! Tarıh úshin qas-qaǵym sát. Biraq mynaý ózgerister ólshemi kóz ilespes jyldamdyqpen jarysqan búgingi kezeń úshin az ýaqyt ta emes sıaqty. Qalaı bolǵanda da, osy ýaqyt ólsheminiń ishinde Qazaqstan halqynyń eren eńbeginiń nátıjesinde álemniń ataqty astanalarymen saltanat jarastyryp, kórkimen de, kólemimen de boı talastyra alatyn qazaq jurtynyń jas ta bas qalasy qalyptasty. Osydan týra 24 jyl buryn astanany aýystyrý ıdeıasy alǵash jarıa etilgende, bul tym «ushqary» pikirdiń qaptaǵan qarsylastary túgil, at tóbelindeı jaqtastary da aınalasy 20 jyldyń ishinde el kindigi – Arqa tósinde osyndaı zamanaýı megapolıs boı kóteredi dep oılamaǵan edi.