Qasyl Qatyqbaeva atyndaǵy jarys jeńimpazy bilim grantyn utyp aldy.

Ozattar oza shapty. Almatydaǵy mektep oqýshylary arasynda ótken Qasyl Qatyqbaeva atyndaǵy jarystyń jeńimpazy anyqtaldy. 3 kezeńnen súrinbeı ótken tálimger joǵary oqý ornyna tegin bilim alýǵa joldama aldy. Al İ, İİ jáne İİİ oryndy ıelengenderge qarjylaı syılyq berildi. 10 kúnge jalǵasqan dodaǵa áý basta 200 úmitker qatyssa, aqtyq márede baq synaýǵa 30-y qalypty. Túlekter birinshi test tapsyrǵan, keıin ana tilinde oıyn erkin jetkizý deńgeıin baqylaý maqsatynda esse jazsa, sońynda ustaz bolǵan jaǵdaıda ustanar jobasyn qorǵaǵan. Osy synnan súrinbegender saralanyp, saltanatty túrde marapattaldy. Qala ákimi Baýyrjan Baıbek memlekettiń myqtylyǵy - bilimdi azamattarmen ólshenetindigin jetkizdi. Túlekterge aq jol tilep, syndarly sátten abyroımen  ótýlerine tilekshi ekenin aıtty.

«Elbasy ózderińiz biletindeı, 5 áleýmettik reformany aıtty. 20 myń grant qosylady. Jeke qordan taǵy da granttar qosylady degen sóz. Ol da Elbasynyń saıasatyn qoldaý. Myna otyrǵan bizdiń shákirtterimiz bolashaqta damyǵan elde turady dep senemin. Bilimniń arqasynda», - dedi Almaty qalasynyń ákimi Baýyrjan Baıbek.

Ustaz bolýdy maqsat etken jeńimpaz da qazylar alqasynyń aldynda muǵalimdik mindetti atqaryp júrgen sala mamany  ǵylymı tilmen tálimgerge dáristi túsindirý qate ekenin aıtyp, moıyndatyp shyqqan. Fızıka-matematıka fakúltetinde tegin oqýǵa múmkindik alǵan grant ıegeri jarystan keıin bilimge degen jigerim odan ári artty - deıdi.

«Meniń oıymsha, oqýshyǵa eshqashan da kitaptyń tilimen sabaq túsindirmeýi kerek. Ǵylymı tilde jazylǵan til - oqýshyǵa ǵana emes, úlken adamdardyń ózine qıyn. Olardy qyzyqtyryp, ómirlik mysaldar keltire otyryp, bala ony qyzyqpasa da túsinip alady dep oılaımyn. Meniń jeńip alǵan  grantym Abaı atyndaǵy Ulttyq pedagogıkalyq ýnıversıtetiniń granty. Men úshin kútpegen jańalyq boldy. Fızıka-matematıka pánin tańdap, muǵalim, bolmasa ǵalym da bolǵym keledi», - dedi «Qasyl Qatyqbaeva» atyndaǵy grant ıegeri Baqytjan Ábek.