Almatyda Eýropa kınosynyń aptalyǵy bastaldy.

Dástúrli sharada Ulybrıtanıa, Majarstan, Germanıa jáne Fransıanyń kınokartınalary kórsetiledi. Aptalyq «Arman» kınoortalyǵynda ótedi. Fılmder túpnusqa tilde oryssha sýbtıtrmen kórsetiledi.

Dástúrli shara shymyldyǵyn ulybrıtanıalyq rejıser Stıven Lavrıdjdiń «Matangı/Maııa» atty derekti fılmi ashty. Kınokartınada Shrı-Lankanyń týmasy Matangı Arýlpragasamnyń ómiri týraly baıandalady. Tanymal ánshi týraly týyndy TMD aýmaǵynda tuńǵysh ret kórsetilip otyr.

«Kezekti Eýropa kınosynyń aptalyǵynda burynǵydan qysqa formatty tańdadyq. Aptalyqta eńbek jolyn endi bastap jatqan jas rejıserlardyń týyndylary kórsetiledi. Olardyń fılmderi osy ýaqytqa deıin kınosynshylardyń joǵary baǵasyn alǵan. Sondaı-aq talaı halyqaralyq kınofestıvalde júldelerdi ıelengen»,-dedi Brıtan keńesi marketıń jáne qoǵammen baılanys jónindegi menedjeri Elena Sım.

Uıymdastyrýshylar ár kórermenniń qalaýyna saı keletindeı túrli janrlardy qamtıtyn baǵdarlama qurdyq - deıdi. Aptalyq aıasynda nemis rejıseriniń «Qatarlar arasynda», «Kún sáýlesin kirgiz» melodramasy jáne «Iýpıterdiń jerserigi» atty fılmder kórsetiledi.

Jalpy, shara aıasynda kári qurlyq memleketteriniń asa tanymal 4 kınotýyndysy kórsetiledi. Arnaıy iriktelgen kartınalardyń barlyǵy eýropalyq bolmystan syr shertip, ondaǵy halyqtyń tynys-tirshiligin baıandaıdy. Sondaı-aq qurlyqtyń toǵysqan túrli mádenıetin jańa qyrynan tanytatyn aptalyq turǵyndardyń kópten kútetin sharasyna aınalyp úlgergen.

Eýropa kınosynyń aptalyǵy 27 mamyrǵa deıin ótedi.  Eýropanyń shynaıy beınesin jańa qyrynan tanytatyn tyń kartınalar «Arman» kınoortalyǵynda kórsetiledi. Jurtshylyq nazaryna usynylatyn barlyq týyndylar orys tilindegi sýbtıtrlarmen túpnusqada beriletin bolady.