Almatyda taǵy da dabyl qaǵyldy. Bul Alyp shaharda ótken kezekti seısmojattyǵý dabyly bolatyn. Qalanyń qutqarý qyzmetteri jer silkinisi bolǵan kúnde ne isteý kerektigin pysyqtady. Búgingi jattyǵýǵa 150-deı mekeme qatysty. Al mańyzdy sharany qala ákimi Baýyrjan Baıbek ózi qadaǵalady.

Senarı boıynsha apat dabylyn estigen stýdentter oqý korpýsynan jappaı syrtqa umtyldy. Qaýipsiz aımaqqa kelgender birden qasyndaǵy dostaryn túgendeı bastady. Eki adamnyń ǵımaratta qalyp qoıǵany anyqtaldy. Ony top basshysy qolyndaǵy qyzyl tústi belgimen kórsetti. Al eger jasyl belgi bolsa, onda kýrstastar túgel degendi bildiredi. Sonymen qutqarýshylar zilzaladan zardap shekkenderge kómektesý úshin nysan ishine qaraı asyqty. Belgili bolǵandaı, qos azamat ta aýyr jaraqat alypty. Olarǵa birden alǵashqy kómek kórsetildi. Almaty ákimi tótenshe jaǵdaıda qorǵanýdyń alǵysharttaryn jadyda saqtaý kerektigin aıtty.

Kolejde bastalǵan seısmojattyǵý mektepte jalǵasty. Munda Tótenshe jaǵdaılar departamenti mamandary zilzala kezinde qutqarýǵa qajetti tehnıkany jáne jabdyqtardy qala ákimi Baýyrjan Baıbekke kórsetti. Munda qajetti kıim-keshek, uzaq ýaqyt buzylmaı turatyn taǵamdar, shatyrlar men jatyn oryndar bar. Aıta keteıik, ár kez daıyn turýy tıis shabadannyń ishinde jip, órtke qarsy qolbaq, jańbyrdan qorǵaıtyn shekpen, qajetti dári-dármek, radıo, sham, kómek shaqyrýǵa ysqyryq, sý bolǵany abzal -  deıdi Qyzyl Jarty aı qoǵamynyń eriktileri.

«Dári qobdıshasyn ár adam óz qajettiligine qaraı toltyrady. Mezgilge baılanysty kıim-keshekter jáne mindetti túrde tabany bıik aıaq-kıim bolǵany durys. Óıtkeni, jer silkinisinen keıin qırandylar arasynda júrý jeńil bolady. Bizdiń sómkede folgadan jasalǵan oranǵysh bar. Ol qysta sýyqtan, jazda ystyqtan saqtaıdy», - dedi  Qazaqstan Qyzyl Jarty aı qoǵamynyń úılestirýshisi Rýslan Hrýshev.

 Jasandy tótenshe jaǵdaıdy uıymdastyrǵan qalanyń qutqarý qyzmetteri tabıǵı apattyń aıtyp kelmeıtindigin, sondyqtan zilzalaǵa barynsha daıyn bolý kerektigin jaqsy biledi. Bıyl osyndaı seısmojattyǵýlar qalanyń basqa da aýdandarynda jalǵasady. Ásirese, halyq kóp shoǵyrlanatyn nysandarda júrgizilmek.

«Seısmojattyǵýdy uıymdastyrýdaǵy maqsatymyz - qutqarý qyzmetindegi mamandardyń daıyndyǵyn pysyqtaý. Oǵan qosa, halyqty zilzala kezinde durys áreket etýge úıretýimiz kerek. Máselen, búgin qalanyń jolaýshylar kóligi basqarmasymen birigip, zilzala oryn alǵan jerden adamdardy ózge oblystarǵa jetkizý úshin temirjol vozkaldaryna tasý áreketin de ótkizdik», - dedi  Almaty qalasy TJD azamattyq qorǵanys basqarmasynyń basshysy Qalymbek Aqbuzaýov.

Almaty ákimi Baýyrjan Baıbek halyq tótenshe jaǵdaılar kezinde naqty áreket etip, tıisti erejelerdi umytyp qalmaý úshin jańa aqparattyq jadynama daıyndaýdy tapsyrdy. Ony barlyq turǵyn úıler men jarnamalyq qurylymdarǵa ilý josparlanyp otyr.