Almatyda revmatologıalyq aýrýlardy emdeýdiń zamanaýı tásilderi talqylandy.

Almaty qalalyq Revmatologıa ortalyǵynyń 10 jyldyǵyna oraı halyqaralyq ǵylymı-tájirıbelik konferensıa ótti. Jıyn barysynda revmatologıalyq aýrýlardy emdeýdiń zamanaýı tásilderi talqylandy. Sonymen qatar, 100-den astam revmatolog dıagnostıkalaý, naýqastardy otaǵa daıyndaý syndy mańyzdy máselelerdi sóz etti. Reseıden arnaıy kelgen mamandar da óz tájirıbelerimen bólisti.

«Men Qazaqstandaǵy áriptesterimdi 10 jyldyq mereıtoımen quttyqtaǵaly keldim. Bul - Almatydaǵy 5 jarym myńnan asa naýqasqa medısınalyq kómek kórsetip otyrǵan mańyzdy ortalyq. Reseıdiń revmatologıa qaýymdastyǵy men Nasonova atyndaǵy revmatologıa ınstıtýty Almatydaǵy ortalyqpen burynnan tyǵyz baılanysta jumys isteıdi. Biz áli kúnge deıin dostyq qarym-qatynastamyz, únemi ǵylymı ıdeıalarymyzben bólisip, keıbir aýyr naýqastarǵa qatysty keńes alyp otyramyz», - dedi Máskeý qalasy Nasonova V.A. atyndaǵy FBNÝ revmatologıa ǵzı, ǵylymı hatshysy Vera Amırdjanova(Reseı).

Konferensıa barysynda revmatologıa salasynyń damýyna úles qosyp júrgen ǵalymdar men bilikti dárigerler marapattaldy. Almatydaǵy ortalyq elimizdegi jalǵyz mekeme bolǵandyqtan memleketten de qoldaý jaqsy. Máselen, bıyl tek qalalyq búdjettiń ózinen 800 mln teńgeden asa qarjy bólingen.

«Respýblıka boıynsha osy ortalyq naýqastarǵa stasıonarlyq kómek kórsetip otyr. Medısınalyq tehnologıalar osy bizdiń ortalyq arqyly Qazaqstanǵa tarap otyr. Keleshektegi bizdiń oıymyz - osyndaı ortalyqtar Qazaqstannyń barlyq oblys ortalyqtarynda ashylýy kerek. Óıtkeni, aýrýlardyń sany kóbeıip jatyr, olarǵa óz aımaqtarynda tıisti kómek kórsetilýi tıis», - dedi Almaty qalasy Densaýlyq saqtaý basqarmasynyń basshysy Serikbol Mýsınov.