Almatyda kógildir otyn saqtaıtyn rezervýarlar jappaı alynyp jatyr.

Almatyda 60 jyldan beri turǵan kógildir otyn saqtaıtyn rezervýarlar jappaı alynyp jatyr. Óıtkeni, turǵyndar gazdyń ortaq júıesine qosylǵandyqtan, eski qurylǵylar kereksiz bolyp qalǵan. Onyń ústine, jerge kómilgen bóshkelerden jazda kógildir otynnyń ısi shyǵyp, adam ómirine qaýipti bolatyn - deıdi turǵyndar.

Bul almatylyqtardyń biri bilse, endi biri bilmeıtin gaz saqtaıtyn rezervýarlar. Máselen, Almaly aýdanyndaǵy myna aýlada onyń birden úsheýi jer astyna kómilgen. Óıtkeni, turǵyndar osyǵan deıin bóshkelerden úılerine kógildir otyn alyp otyrǵan. Árqaısysynyń kem degende 60 jyldyq tarıhy bar. Qazir qoldanystan shyǵyp qalǵan rezervýarlardy qala ákimdigi jappaı alyp, al ornyn kógaldandyryp jatyr.

«Qazirgi tańda 60 gazgolder bolǵan Almaly aýdany boıynsha. Sol 60-tyń 15-i qalyp otyr. 10 maýsym aıyna 10-yna deıin alyp bitedi. Alynǵan gazgolderlerdiń ornyna jasyl gazon otyrǵyzylady jáne gúl otyrǵyzylady. Sol satyp alǵan kompanıa ózderiniń kóriktendirýin jasap ketedi», - dedi  Almaty qalasy Almaly aýdandyq komýnaldyq sharýashylyq bóliminiń bas mamany Dáýlet Eshmuratov.

Qazir kereksiz bolyp, úlken aýmaqty alyp jatqan qurylǵylardyń orny qulpyratynyna turǵyndar qýanyshty. Endi myna aýladaǵy 4 turǵyn úıdegi 160-taı páterdi gazben qamtyp kelgen rezervýardyń burynǵy jeri adam tanymastaı ózgeredi. Tipti, halyq biraz ýaqyttan beri aýdan ákimdigine tapsyryp berip, eski rezervýardy alyp tastaýdy ótinipti.

«Kóp jyl boıy bizde suıytylǵan gaz boldy. Árıne, óte qınaldyq. Ol óte qymbat bolatyn. Bitip qalatyn. Bitip qalǵan kezde kútip júretin edik. Óte yńǵaısyz bolatyn. Gazgolderdi qazir alyp tastap jatqandyǵy óte yńǵaıly boldy. Qanshama oryndy alyp turdy. Arasynda gaz shyǵyp turatyn. Adam densaýlyǵyna zıan bolatyn», - dedi PIK tóraıymy Sara Saǵyndyqova.

Al alynyp qalǵan rezervýardy gazben qamtyp kelgen kompanıalar iske jaratatyn kórinedi. Aıta keteıik, Almatyda osyndaı eski jer astyna kómilgen bas-aıaǵy 300-deı gaz saqtaıtyn bóshke bar. Olar shamamen 1966 jyldary iske qosylyp, qala tolyqtaı tabıǵı gazǵa kóshken jyly óshirilgen.