Ombýdsmen Asqar Shákirov Reseı Federasıasynyń ombýdsmeni Tatána Moskalkovaǵa Tomırıs Baısafanyń ólimine qatysty is ádil júrgizilýine yqpal etýin surady, dep habarlaıdy Qamshy.kz aqparat agenttigi Qazaqstandaǵy adam quqyǵy jónindegi ókiletti apparatynyń baspasóz qyzmetine silteme jasap.

Tergeý jumystaryn Máskeýdiń batys ákimshilik aımaqtyq tergeý basqarmasy júrgizip jatyr.

«Asqar Shákirdiń tergeý isine qatysty kúmán keltirýine Tomırıstiń ata-anasynyń bergen aqparaty jáne tergeý isine qatysty aqparatty berýden bas tartýy túrtki bolǵan. Qaıtys bolǵan stýdenttiń ata-anasy tergeý organdarynyń keıbir saraptama jumystaryn júrgizbegenin baıqaǵan. Tomırıstiń ata-anasynyń aıtýynsha, tergeý kezinde tek bir ǵana kýáger suralǵan. Sondyqtan prosesýaldy sheshim qabyldanǵanǵa deıin BAQ-ta bolǵan jaǵdaıǵa qatysty túrli boljam aıtylǵan», - delingen Asqar Shákirovtyń atynan taraǵan Qazaqstandaǵy adam quqyǵy jónindegi ókiletti apparatynyń málimdemesinde.

Marqumnyń ata-anasy – Darhan Qojabergenov pen Janna Ahmetova reseılik mamandardan ádiletti ári obektıvti tergeýdi talap etip otyr. Reseılik tergeý mamandarynyń boljamynsha, qyz óz-ózin óltirgen. Alaıda ata-anasy bul derekke senýden bas tartty.

«Bul istiń jumbaǵy kóp. Tergeý organdary jasaýy tıis keı áreketter jasalmaı jatyr. Máselen, Mýrtýzalı Medjıdovanyń aınalasy ǵana tergelip jatyr. Aýdıtorıa ishinde qyzym ekeýi ǵana bolǵan. Jigit bólmeniń esigin ústelmen tirep qoıady. Nege bulaı istegeni belgisiz. Aqyl esi durys eki azamat aýdıtorıaǵa kiredi. Qazir bireýi joq, al ekinshisi tipti kúdikti retinde tanylyp otyrǵan joq. Ol qazir tek kýáger eken», - dedi ashyndy Tomırıstiń anasy Janna Ahmetova.

13 sáýirde bolǵan oqıǵaǵa sáıkes, kýágerler qyzdy bireýdiń terezeden qulatyp jibergenine senimdi.

«Ol bostandyqta júr. Jarty kún ustapty da, jibere salypty. BAQ ókilderi alǵashynda qyzymdy bireýdiń ıterip jibergenin jarysa jazǵan. Bizge myna tergeý jumystary bóget keltirip otyr. Olarǵa Medjıdov "qyz ózi qulady" dep sendirgen. Tergeý organdary soǵan senip otyrǵan kórinedi. Al qyzymnyń dostarynan eshkim eshteńe suramaǵan», - dedi Janna Ahmetova.

Esterińizge sala keteıik, 2018 jyldyń sáýir aıynda Tomırıs Baısafa Máskeý memlekettik halyqaralyq qatynastar ınstıtýtynyń 4-shi qabatyndaǵy dárisqananyń terezesinen qulap ketken.

1997 jylǵy Tomırıs tańǵy 4.00-te qaıtys boldy. Tergeýshiler sáýirde  atalmysh iske qatysty qylmystyq is qozǵaǵan. Tergeýshilerdiń málimetinshe, qyz birden aýrýhanaǵa jetkizilgen. Qaıǵyly oqıǵa 13 sáýirde boldy.

Tomırıs halyqaralyq ekonomıkalyq qatynastar kafedrasynyń 4-shi kýrsynda oqyǵan. Ol úzilis kezinde terezeden qulap ketken. Beıresmı aqparatqa sáıkes, ony ıterip jibergen.