Bıyl Almaty oblysynda Paraplanerlyq sporttyń dálme-dál qoný túrinen Álem kýbogy ótedi. Bul týraly shara uıymdastyrýshylary - Ekstremaldy sport federasıasynyń jetekshisi Igor Vırshkı, Ekstremaldy sport federasıasy jetekshisiniń orynbasary Sábına Azambaeva, bapker, sport sheberi Igor Korenskııdiń qatysýymen Óńirlik komýnıkasıalar ortalyǵynda ótken baspasóz máslıhatynda belgili boldy.

Ekstremaldy sport federasıasynyń jetekshisi Igor Vırshkıdiń sózinshe, álem chempıonaty Jońǵar Alataýynda 4-6 mamyr aralyǵynda uıymdastyrylady. Taýdyń ornalasýy áýede ushýǵa qolaıly alań bolyp tabylady. 

«Shalǵaı aımaqta álemdik deńgeıdegi shara nege ótkizilip jatyr degen saýal týyndaýy múmkin. Onyń basty sebebi 2016 jyly óńirde Azıa chempıonaty, odan buryn 2015 jyly Azıa chempıonaty aldyndaǵy jarystyń ótýi. Halyqaralyq aeronavtıka qaýymdastyǵy bizdiń ushý oryndaryn, saıystardy uıymdastyrý men daıyndyq deńgeıin óte joǵary baǵalady. Sondyqtan, mamyr aıynda Álem kýbogyn ótkizý qurmeti usynyldy», - dep atap ótti Igor Vırshkı.

Álem kýbogynda Úndistan, Chehıa, Koreıa, Kosovo, Mońǵolıa, Kıpr, Rýmynıa, Serbıa, Slovenıa, Túrkıa, Ýkraına sıaqty t.b. 15 shet memleketten 100-den astam sportshy qatysady.

Sporttyq sharanyń seriktesi bolyp tabylatyn Óńirlik kásipkerler palatasy halyqaralyq deńgeıdegi oqıǵanyń oryn alýy aımaqta aerotýrızmniń damýyna jańa serpin beretinine senimdi.

Jalpy is-shara Ekstremaldy sport federasıasy, Qazaqstan avıasıalyq sporty federasıasy jáne Almaty oblysynyń Kásipkerler palatasynyń uıymdastyrýymen ótedi.