Golden Boy Promotions promoýterlik kompanıasynyń prezıdenti Erık Gomes Gennadıı Golovkın men Saýl "Kanelo" Alvares arasyndaǵy ekinshi jekpe-jekti ótkizý múmkindigi nólge teń ekenin aıtty, - dep habarlaıdy Vesti.kz.

"Qazir osy jekpe-jekti uıymdastyrý múmkindigi - "óli kúıde". Olardan jaýap kútemiz dep 5-6 apta ýaqyt joǵaltyp aldyq. Alaıda sonsha ýaqyttan keıin qaıtyp oralǵanda, olardyń kótergen máselesi qorlaý bolyp sanalady. Olardyń suranystary tym kúlkili. Biz ary qaraı jyljımyz. Menińshe, Golovkın ekinshi jekpe-jek ótkizýge qorqady", - dep jazady BoxingScene Gomestiń sózin.

Qazaqstandyq boksshynyń promoýteri Tom Leffler kelissózder barysynda túsinspeýshiliktiń neden shyqqanyn aıtty. Onyń aıtýynsha, basty másele - qarajatqa kelip tirelgen. Bul jerde GGG jekpe-jekten túsken tabysty 50-de 50 bólisýdi usynǵan, al meksıkalyq boksshy 65 paıyz surap otyr. Birinshi jekpe-jekte gonorar 70-te 30 bolyp meksıkalyqtyń paıdasyna kóbirek sheshilgen edi.

"Golovkınniń bar aıtqany: "Men tabystyń 50-de 50 bolǵanyn qalaımyn. Men chempıonmyn". Birinshi jekpe-jekte barlyǵyna kóndik, az paıyzyn aldyq. Golovkın óziniń qundylyǵyn qansha dáleldese de biz qanshama usynystarǵa kóndik. Alaıda Alvares, nege ekeni belgisiz, tabystyń kóp paıyzyn alǵysy keledi eken. Gennadııdiń oıynsha,bul ádil emes. Chempıon nebári 35 paıyz ǵana almaýy tıis", - dedi BoxingScene.com Lefflerdiń sózin.

Osyǵan deıin meksıkalyq boksshynyń promoýteri Oskar De La Hoııa Golovkındi uzaq ýaqyt boıy kúte almaıtyndaryn jáne basqa da kandıdattardy qarastyratynyn aıtqan edi. Olardyń biri Golovkınniń burynǵy qarsylasy - amerıkalyq boksshy Denıel Djeıkobs.