Qarýly Kúshterge qarasty Radıoelektronıka jáne baılanys-áskerı ınjenerlik ınstıtýtynda bitirýshi túlekteri úshin memlekettik attestasıalyq emtıhan bastaldy. Ofıserler quramynan taǵaıyndalǵan komısıa músheleri óz jumystaryna kirisip te ketti. Instıtýt bastyǵy polkovnık Asqar Mustabekov ár bitirýshi túlek erteńgi kúni komandır atanyp, jeke quram aldynda úırengenimen bólisetinin jáne adam ómirine, áskerı tehnıkaǵa, táýelsizdik tuǵyryna jaýapty ekendikterin eskerte kele, syn saǵatta synnan súrinbeı ótýlerine tilektestigin jetkizdi. Kýrsanttar belgilengen kúni tańdaǵan páni men dene daıyndyǵy boıynsha memlekettik emtıhan tapsyryp, dıplomdyq jumystaryn qorǵaıdy.
Bıyl ınstıtýt qabyrǵasynda 214 bitirýshiniń 42-si oqý úzdigine, 12-si oqý úzdiginiń tós belgisine úmitker. Salystyrmaly túrde 2017 jyly oqý úzdigi 32 bolsa, oqý úzdiginiń tós belgisin 4 bitirýshi taqqan bolatyn. Instıtýtta bilim beretin oqytýshy-professorlar quramynyń qajyrly eńbekteriniń nátıjesinde bilim berý sapasy artyp, oqý úzdikteriniń sany eselendi.
Bilim men sportty, óner men zıatkerlikti qatar serik etip, joǵary jetistikterge jetken kýrsanttar da jeterlik. Bes jyl ishinde 214 kýrsanttyń 186 ártúrli sanatta sporttyq dárejege qol jetkizdi. Oladyń 4-eýi sport sheberi atansa, 7-eýi sport sheberligine úmitker. Solardyń biri kýrsant A.Raqymjanov oqýda ozat atanyp, oqý úzdiginiń tós belgisine úmitkerligimen qosa dzúdo men qazaqsha kúresten sport sheberligin qorǵap, respýblıkamyzdyń birneshe dúrkin chempıony atandy. Kýrsant A.Baısalbaev TMD Qarýly Kúshteriniń arasynda ótken gir tasyn kóterý saıysynyń eki dúrkin kúmis júldegeri, Qazaqstan Respýblıkasynyń úsh dúrkin chempıony atanyp, sport sheberi ataǵyn qorǵady. Sonymen qatar, oqý úzdikteri jáne sport sheberleri kýrsant R.Ismaılov gir tasyn kóterýden, kýrsant M.Naýryzbaev sporttyq baǵdarlaýdan el chempıony ataǵyn jeńip aldy.
Kóńildi tapqyrlar klýbynyń sahnasynda jarqyndaı jarqyldap, ótkir ázilderimen kóremenderdiń kóz aıymyna aınalyp, joǵarǵy lıgaǵa deıin kóterilgen «Baılanys jigitteriniń» kýrsanttary D.Sultanbaı men S.Amanjolov oqýda ozat, sportta alǵyr, ónerde komandany jeńiske jeteledi. Al oqý úzdiginiń tós belgisine úmitker kýrsant S.Qurbanbek aqyndyq ónerdi boıyna sińirip, qoıan-qoltyq tóbelesten respýblıka boıynsha júldeger atandy.
Instıtýttyń 5 oqý úzdigi Qazaqstan Respýblıkasynyń Qarýly Kúshteriniń Joǵarǵy Bas Qolbasshysy, Elbasynyń qolynan altyn medal alady dep josparlanǵan.
Qorǵanys salasynyń basshylary bilikti komandırlerdi daıyndaýda durys baǵytty tańdaı alǵan. Instıtýt basshylary, oqytýshy-professorlar quramy jáne bitirýshi túlekterdiń batalón, rota, vzvod komandırleri ózderine qoıylǵan jaýapkershilikti tolyqtaı oryndap keledi. Aldaǵy ýaqytta da bilikti de bilimdi, kásibı deńgeıi joǵary, antyna adal patrıot ofıserlerdiń sanyn arttyrýdy maqsat etip qoıǵan.
