Elordamyz-Astana qalasynyń 20 jyldyǵy aıasynda Qazaqstan Respýblıkasy Mádenıet jáne sport mınıstrliginiń bastamasymen Ońtústik Qazaqstan oblysy, Sh.Qaldaıaqov atyndaǵy oblystyq fılarmonıa zalynda «Burabay Summer Fest» Halyqaralyq balalar men jasóspirimder televızıalyq festıvali ótti. Bul týraly Qamshy.kz aqparat agenttigi OQO mádenıet basqarmasyna silteme jasap habarlaıdy.

Festıváldiń maqsaty- elimizdiń árbir oblys, aýdandaryndaǵy daryndy balalar men talantty jastardy anyqtaý jáne olarǵa jan-jaqty qoldaý kórsetý, shyǵarmashylyq qabilettiligin damyta otyryp, oryndaýshylyq sheberlikterin shyńdaý, halyqaralyq mádenı baılanystardy damytý jáne nyǵaıtý, tájirıbe almasý, otansúıgishtikke tárbıeleý, elimizdiń ulttyq óneri men tarıhyna degen qyzyǵýshylyqty arttyrý, jalpyadamgershilik qundylyqtardy qalyptastyrý bolyp tabylady.

Osy oraıda, óńirimizden atalǵan baıqaýǵa 10-16 jas aralyǵyndaǵy 200-den asa úmitker qatysyp, 9 janr boıynsha (dástúrli án, akademıalyq án, estradalyq án, kórkemdik oqý, ulttyq mýzykalyq aspaptarda oryndaý, klasıkalyq mýzykalyq aspaptarda oryndaý, estradanyń súıemeldenýimen mýzykalyq aspaptarda oryndaý, horeografıalyq jáne beıneleý óneri) óner kórsetip, úzdik dep tanylǵan 16 úmitker aqtyq kezeńge joldama aldy.

Elimizdiń barlyq oblys, qalalarynan iriktelgen úmitkerler Qazaqstan Respýblıkasynyń Mádenıet jáne sport mınıstrliginiń uıymdastyrýymen 2018 jylǵy 2-11 maýsym kúnderi Aqmola oblysy Býrabaı demalys aımaǵynda baq synap, 16 maýsym kúni Astana qalasyndaǵy gala-konsertke qatysatyn bolady.